Իրաքի զինվոականներն ու քրդական փեշմերգան Մոսուլը «Իսլամական պետության» գրոհայիններից ազատագրելու գործողության շրջանակներում երկու նոր ճակատ են բացել Մոսուլից հյուսիս-արեւելք ընկած հատվածում, հաղորդում է «Ասոշեյթեդ Փրեսը»։
Քրդական ուժերը գործակալությանը հայտնել են, որ հարձակումն սկսել են Բաշիքա քաղաքի մոտ։ Իրաքի հատուկջոկատայինների հրամանատար, գեներալ-մայոր Հայդեր Ֆադիլը նշել է, որ հարձակում է իրականացվում նաեւ հենց քաղաքի վրա, որը շրջապատված է եւ մի մասն արդեն ազատագրված է գրոհայիններից։
Բաշիքայից ոչ հեռու գտնվում է նույնանուն ռազմաբազայն, որտեղ տեղակայված են թուրք զինվորականները, որոնք Իրանք են մտել 2015-ի վերջին՝ Մոսուլի վրա հարձակման համար իբր սուննի եւ քրդական ուժերի նախապատրաստման առիթով։ Իրաքի իշխանությունները քննադատել են թուրքական ուժերի ներկայությունը, քանի որ այն չէր համաձայնեցվել Բաղդադի հետ, եւ կոչ են արել Անկարային դուրս բերել իր զինվորականներին։
Հիշեցնենք, որ Մոսուլի ազատագրումն սկսվել է հոկտեմբերի 17-ին։ Առաջին օրերին ռազմական գործողություններն ընթանում էին հրավային ուղղությամբ, որտեղ իրաքյան ուժերին հաջողվել է վերահսկողության տակ վերցնել մի քանի տասնյակ բնակավայրեր։
