«Պատանի լրագրողներ» դպրոցի տնօրեն Վահան Ղազարյանը չի ընդունում, որ դիտավորյալ է սպանել 22-ամյա Լևոն Սահակյանին: NEWS.am-ի թղթակցի հետ զրույցում նրա փաստաբան Մարինե Ֆարմանյանը նշեց, որ Ղազարյանն իրեն առաջադրված մեղադրանքը չի ընդունում:
«Իմ պաշտպանյալն ասում է, որ սպանելու դիտավորություն չի ունեցել, ուղղակի վեճի արդյունքում է այդպես ստացվել: Ղազարյանն ասում է, որ ինքը չի կանչել Լեւոն Սահակյանին, իրենք եկել են, խոսել են, հետո վեճի է վերածվել, իր ասելով, վնասելու մտադրություն չի ունեցել, առավել եւս կյանքից զրկել»,- ասաց փաստաբանը:
Հիշեցնենք, որ հոկտեմբերի 19-ի երեկոյան «Պատանի լրագրողների» դպրոցի տնօրեն Վահան Ղազարյանի եւ Լեւոն Սահակյանի միջեւ վիճաբանությունը սկսվել էր Լեւոնի նշանածի աշխատավարձը չվճարելու պատճառով: Լեւոնի նշանածը՝ Սեւան քաղաքի բնակչուհի Արեգնազը, աշխատելիս է եղել Վահան Ղազարյանի մոտ, որին դպրոցի տնօրինությունը աշխատավարձը չի վճարել: Այդ օրը Վահան Ղազարյանը 22-ամյա երիտասարդին զանգել եւ կանչել է դպրոց՝ նշանածի աշխատավարձը տալու համար, սակայն, նրանց միջեւ վիճաբանություն է սկսվել, որից հետո սրտի եւ թոքի վնասվածքներով Լեւոնը տեղափոխվել է հիվանդանոց, որտեղ երկու օր անց մահացել է:
Դեպքի առթիվ հարուցվել է քրեական գործ, Վահան Ղազարյանը կալանավորված է: