Չինաստանի Չժեցզյան նահանգի բնակիչը ավտոկայանատեղիից գողացել է ամենագնաց մեքենան, իսկ առավոտյան վերադարձրել տիրոջը՝ բաքը լիքը բենզին լցրած։ Այս մասին գրում է South China Morning Post–ը։
Միջադեպը տեղի է ունեցել Հանչժոու քաղաքում։ 19-ամյա երիտասարդը կայանատեղիից գողացել էր Land Rover ամենագնացը, իսկ հաջորդ առավոտյան վերադարձել նույն կայանատեղին եւ այդտեղ թողել մեքենան՝ նախապես բաքը լիզքը բենզին լցնելով։ Մեքենայի տերը դիմել էր ոստիկանություն։ Իրավապահները տեսախցիկների տեսագրությունների օգնությամբ պարզել էին կասկածյալի ինքնությունը։
Ձերբակալվածի խոսքով՝ ինքը գտել էր բանալին եւ որոշել էր փորձել բացել մեքենաներից մեկը։ Արդյունքում նա գործի էր գցել Land Rover–ը եւ մեկնել։ Մեքենան գողանալու դրդապատճառները կասկածյալը չի հայտնել։ Ոստիկանությունը շարունակում է հետաքննել, թե որտեղից է երիտասարդի մոտ հայտնվել մեքենայի բանալին։ Նրան 10 օրով ձերբակալել են եւ մոտ 75 դոլար տուգանք նշանակել։