Եվրամիությունն իր գործունեության առանցքն է դիտարկում արեւելյան գործընկերության երկրներում տնտեսական աճին օժանդակելը: Այս մասին, այսօր՝ հոկտեմբերի 24-ին, լրագրողների հետ հանդիպման ժամանակ նշել է Հայաստանում ԵՄ պատվիրակության ղեկավար, դեսպան Պյոտր Սվիտալսկին՝ ներկայացնելով Հայաստանում այսօր մեկնարկած «ԵՄ-ն բիզնեսի համար» խորագրով միջոցառումների շարքը. Այն կտեւի շուրջ մեկ շաբաթ:
«Հայաստանի նոր կառավարությունն էլ իր ծրագրի առանցքում ունի այս հարցը, ու մենք պատրաստակամ ենք օժանդակել Հայաստանի կառավարությանը բարեփոխումների հարցում, որ հաջող անցում կատարվի արդյունավետ տնտեսության»,-նշեց Սվիտալսկին՝ հավելելով, որ ՀՀ տնտեսության զարգացման հիմնական գործիքներից մեկը փոքր ու միջին ձեռնարկությունների զարգացումն է. «Չիրացված շատ մեծ ներուժ կա Հայաստանում ՓՄՁ-ների ոլորտում։ Հայաստանում զբաղվածության ընդամենը 30 տոկոսն է բաժին ընկնում ՓՄՁժներին, մինչդեռ Եվրոպայում դա 60-70 տոկոս է: Լիահույս ենք, որ ՓՄՁ-ների վրա շեշտադրումը ՀՀ-ում նոր տնտեսական աճ կապահովի երկրի համար»:
ԵՄ դեսպանի խոսքով, հաջորդ ուղղությունը Հայաստանի զարգացման գործում օտարերկրյա ներդրումներն են. «Հավատացած ենք, որ նաեւ Հայաստան-ԵՄ շրջանակային համաձայնագրի ստորագրումը, ինչպես նաեւ իրականացվող բարեփոխումները կօգնեն, որ լրացուցիչ օտարերկրյա ներդրումներ ներգրավվեն, այդ թվում ԵՄ-ից»:
«Մենք համարում ենք, որ տնտեսական համագործակցությունը փոխշահավետ է: ԵՄ-ն, խթանելով տնտեսական աճը, որեւէ եսասիրական ձգտումներ չունի։ Որքան հաջողված լինի Հայաստանի տնտեսությունը, այնքան լավ Եվրամիության համար»,- ընդգծեց Հայաստանում ԵՄ պատվիրակության ղեկավարը՝ վստահեցնելով, որ Հայաստանի կառավարությունն այս իմաստով ճիշտ ուղու վրա է: