Հայաստանի Հարկային օրենսգրքի դրույթներից մեկը վտանգ է ստեղծում երկրից կապիտալի արտահոսքի համար: Այս մասին հոկտեմբերի 24-ին լրագրողների հետ հանդիպմանն ասել է Հայաստանում Ամերիկյան առեւտրի պալատի (AmCham) ղեկավար Տիգրան Ջրբաշյանը:
Նրա խոսքով՝ Հարկային օրենսգիրքն ուժի մեջ է մտնելու 2018 թվականի հունվարի 1-ից, բայց արդեն որոշակի սպասելիքներ է ձեւավորում գործարարների շրջանում, այդ թվում՝ բացասական: Օրինակ՝ 2016 թվականի արդյունքներով շատերը կփորձեն դուրս բերել չբաշխված շահույթը, որպեսզի այն չհարկվի: Նաեւ այն պատճառով, որ Հարկային օրենսգիրքն ավելի բարձր դրույքաչափ է սահմանում օտարերկրյա ֆիզիկական անձանց շահաբաժինների համար (10%), քան տեղականների (5%): Այս դրույթն ուժի մեջ է մտնելու մեկ տարի ավելի շուտ՝ 2017 թվականից:
Ռեզիդենտների եւ ոչ ռեզիդենտների համար անհավասար պայմանները հակասում են Առեւտրի եւ ներդրումների մասին շրջանակային համաձայնագրին (TIFA), որը Հայաստանն ԱՄՆ-ի հետ ստորագրել է 2015 թվականին:
«Ցանկանում եմ սա նշել նաեւ որպես Հայ-ամերիկյան առեւտրի պալատի նախագահ: Ցանկալի է վերացնել այս հակասությունը եւ հավասար պայմաններ ստեղծել բիզնեսի համար»,- ընդգծել է Ջրբաշյանը: