Վրաստանի նախկին նախագահ Միխայիլ Սահակաշվիլին մեկնաբանել է երկրի նախկին առաջին տիկին, «Միացյալ ազգային շարժում» կուսակցությունից մեծամասնական ընտրակարգով առաջադրված Սանդրա Ռուլովսի՝ ընտրությունների երկրորդ փուլից թեկնածությունը հանելու մասին լուրերը: Այս մասին հաղորդում է «Գրուզիա Online»-ը:
Հիշեցնենք, որ նրա որոշումը կուսակցության կազմում ոչ միանշանակ գնահատականներ էր առաջ բերել։ Ոմանք կարծում են, որ դա հարված կհասցնի կուսակցության վարկանիշին, ինչն անթույլատրելի է ընտրություններից երկրորդ փուլից առաջ։
«Ես արդեն ասել եմ, որ յուրաքանչյուր թեկնածու պետք է ինքը որոշի՝ կմասնակցի արդյոք կեղծված ընտրությունների երկրորդ փուլին։ Բոլորն անձնական ընտրության իրավունք ունեն։ Այդ պատճառով Սանդրան որոշում է կայացրել, առանց իմ միջամտության, լսելով սեփական խղճի ձայնը։ Ես հարգում եմ այդ որոշումը ճիշտ այնպես, ինչպես մյուս թեկնածուների որոշումը, որոնք կպայքարեն երկրորդ փուլում։ Ես հույս ունեմ, որ մեր ակտիվիստները հարգանքով կվերաբերվեն Սանդրայի անձնական որոշմանը, առավել եւս, որ նա շատ ջանքեր է գործադրել այդ ընտրություններում, եւ ես գիտեմ, որ նա չի հաշտվի կեղծարարության եւ անարդարության հետ։ Դուք պետք է որ չճանաչեք Սանդրային, որպեսզի մեղադրենք նրան ուրիշի, թող որ անգամ իմ հրամանով գործելու մեջ»,– ասել է Սահակաշվիլին։
Հիշեցնենք, որ Արեւմտյան Վրաստանի մի շարք բնակավայրերում խորհրդարանական ընտրությունների առաջին փուլի կրկնակի քվեարկության արդյունքում «Վրացական երազանք»-ից Սանդրա Ռուլովսի մրցակիցը 48% ձայն է ստացել: Նրա եւ Ռուլովսի միջեւ տարբերությունը շուրջ 900 ձայն է կազմել: Ընտրությունների երկրորդ փուլը հոկտեմբերի 30-ին է:
