Հայաստանում թանկարժեք անշարժ գույքի համար հարկերը պետք է արդարացված լինեն: Այս մասին այսօր՝ հոկտեմբերի 24-ին, լրագրողներին ասել է Հայաստանում Ամերիկյան առեւտրի պալատի (AmCham) նախագահ Տիգրան Ջրբաշյանը:
Պալատը նախկինում հարցումով դիմել է Անշարժ գույքի կադաստրի պետական կոմիտե: Պարզվել է, որ Երեւանում 150 մլն դրամից բարձր կադաստրային արժեքով ընդամենը 5 բնակելի շենքեր կամ բնակարաններ կան: «Համոզվելու համար, թե այդ թիվն իրականությունից որքան հեռու է, բավական է անցնել Հյուսիսային պողոտայով՝ պրեմիում դասի իր նորակառույցներով»,- նշել է Ջրբաշյանը:
Նրա կարծիքով՝ անհրաժեշտ է թանկարժեք անշարժ գույքի վրա ոչ միայն համարժեք հարկ սահմանել, այլեւ աճողական հարկ կիրառել արտադրական եւ գյուղատնտեսական այն օբյեկտների համար, որոնք պարապուրդի են մատնված: «Կարելի առարկել՝ ասելով, թե իմ հողն է, ինչ ցանկանում՝ այն էլ անում եմ: Սակայն եթե ակտիվները չեն գործում, եւ պետությունը հարկեր չի ստանում, ապա դա արդեն մասնավոր անձի խնդիրը չէ, այլ հանրության: Հետեւաբար՝ այս դեպքերում աճողական հարկի կիրառումը միանգամայն արդարացված է»,- նշել է Ջրբաշյանը: