Արտասահմանցի ներդրողները հայկական դրամով արժեթղթերից շահույթը կարող են ստանալ իրենց ցանկացած արժույթով: Այս մասին այսօր՝ հոկտեմբերի 24-ին, խորհրդարանում հայտարարել է Կենտրոնական բանկի փոխնախագահ Ներսես Երիցյանը՝ ներկայացնելով «Արժեթղթերի շուկայի մասին» օրենքում փոփոխությունների նախագիծը եւ կից օրինագծերը:
Օրինագիծը հիմք է ստեղծում ֆինանսական երկրորդական գործիքներով (ֆյուչերսներ, օպցիոններ, սվոպներ) գործարքների համար: Տեսնելով, որ նման գործարքների համար միջազգային ընդունված օրենսդրություն կա, արտասահմանցի ներդրողները չեն վախենա հայկական շուկա մտնելուց: Այդ դեպքում հայկական բանկը կամ հիպոտեքային ընկերությունը կկարողանա պարտատոմս թողարկել հայկական դրամով (օրինակ՝ հիպոտեքային արժեթղթեր) եւ ներդրողին առաջարկել արժույթի փոխարկմամբ ֆորվարդային գործարք:
«Այսինքն՝ ներդրողին հնարավոր կլինի առաջարկել. «Հիմա ես ձեզնից միջոցներ եմ վերցնում ընթացիկ փոխարժեքով, եւ մենք կպայմանավորվենք, թե դրամից արտարժույթի փոխարկելիս ձեզ ինչ փոխարժեքով կվերադարձնեմ այն պահին, երբ կմարեմ պարտատոմսերը: Այսինքն՝ առաջարկը կոնկրետ եւ թվերով կլինի: Ձեռքին այդ թվերն ունենալով՝ արտասահմանցի ներդրողը կարող է գնահատել հայկական շուկայի ռիսկերը: Իսկ դրա համար նրանք պատրաստ են վճարել: Եվ այդ փողերը կմնան մեր երկրում, եւ ոչ թե արտասահմանում»,- նշել է Երիցյանը: