Այսպես կոչված չար ծաղրածուների հարձակումները չի կարելի հասարակ կատակ համարել, վստահ է Բավարիայի ՆԳ նախարար Յոահիմ Հերմանը։ «Նման ստոր արարքները կարող են լուրջ հետեւանքներ ունենալ»,- հայտնել է նախարարը Passauer Neue Presse թերթին տված հարցազրույցում։ Չար ծաղրածուները չպետք է ապավինեն իրավապահ մարմինների ներողամտությանը, հավելել է նախարարը։
«Մենք մտադիր չենք որեւէ բան աչքաթող անել ու հետեւողականորեն յուրաքանչյուր գործը ավարտին ենք հասցնելու։ Այնպես որ կատակը չարագործի համար շատ լուրջ հետեւանքներ կունենա»,- շեշտել է Հերմանը։
Միայն անցած հանգստյան օրերին մի քանի մարդ Գերմանիայի տարբեր քաղաքներում դարձել է չար ծաղրածուների կատակների զոհը, առնվազն երեքը վիրավորում է ստացել։ Պատահական անցորդների վրա դիմակավոր խուլիգանների հարձակումներ են եղել մասնավորապես Բեռլինում, Մյունսթերում, Ռոստոկում, Դույսբուրգում, Քյոլնում, Ախենում, հայտնում է DW–ը։
Հերմանը թերթին տված հարցազրույցում պատմել է հոկտեմբերի 21-ին Մյունխենում մի 10-ամյա տղայի հետ կատարված միջադեպի մասին։ «Անսպասելիորեն թփերի հետեւից դուրս է եկել մի դիմակավոր բղավող ծաղրածու՝ թափահարելով ձեռքի կացինը ու սկսել է հետապնդել երեխային։ Տղան սաստիկ վախեցել է ու փախել»։ Նման տեսագրությունները հրապարակող խուլիգանները կարող են վստահ լինել, որ ոստիկանությունը կգտնի նրանց, սպառնացել է Բավարիայի նախարարը։
Որոշ ժամանակ առաջ չար ծաղրածուների ֆենոմեն էր գրանցվել նաեւ ԱՄՆ-ում։ Հետո արդեն այս երեւույթը տարածում է ստացել Եվրոպայում՝ այդ թվում Գերմանիայում։