«Պատանի լրագրողներ» դպրոցում հոկտեմբերի 19-ին դանակահարված Լեւոն Սահակյանը հիվանդանոցում մահացել է: Այսօր երիտասարդի աճյունը հողին են հանձնել Սեւանի գերեզմատանը:
22-ամյա երիտասարդին դանակահարել էր «Պատանի լրագրողներ» դպրոցի տնօրեն Վահան Ղազարյանը, դպրոցում աշխատող Լեւոնի նշանածին աշխատավարձ չվճարելու համար ծագած վիճաբանության ընթացքում: Ղազարյանը ձերբակալված է: Նա ոստիկանության բաժնում խոստովանել է, որ դանակահարել է Լեւոն Սահակյանին եւ մանրամասներ ներկայացնել:
Ի դեպ, այսօր Լեւոնի նշանածի՝ Արեգնազ Թովմասյանի ծննդյան տարեդարձն է: NEWS.am-ի հետ զրույցում Սահակյանների հարեւաններից տիկին Մարիետան պատմել է, որ երիտասարդները շատ էին սիրում իրար, շուտով պետք է ամուսնանային: Լեւոնն այսօրվա հետ կապված ծրագրեր ուներ:
Մոսկվայում հոկտեմբերի 23-ին բնակարանում Հայաստանի երկու քաղաքացու մարմին են հայտնաբերել՝ 43-ամյա Էդուարդ Նշանյանի ու 46-ամյա Արմեն Իսրայելյանի: Քրեական գործ է հարուցվել:
Սպանության մեջ կասկածում են հայազգի տղամարդու, որի անունը դեռեւս չի հրապարակվում։ Նա հետախուզման մեջ է: Հայտնի է, որ սպանվածները Երեւանից են, Ռուսաստան էին մեկնել արտագնա աշխատանքի:
Տղամարդկանց սկսել են որոնել հարազատների ահազանգով, քանի որ որոշ ժամանակ նրանցից որեւէ տեղեկություն չեն ունեցել: Նախնական տվյալներով՝ Նշանյանն ու Իսրայելյանը մահացել են 3-5 օր առաջ:
Որոշ տեղեկություններով՝ 46-ամյա Արմեն Իսրայելյանը գործարար Սամվել Ալեքսանյանի՝ «ձկնկուլ» մականունով հայտնի նախկին աշխատակիցն է: Նա հայկական թերթերից մեկին տված հարցազրույցում բողոքել էր, որ Ալեքսանյանն իրեն զրկել է ունեցվածքից՝ տիրանալով իր ընտանեկան բիզնեսներին: Հարցազրույցի շուրջ բարձրացած աղմուկից հետո նա հեռացել էր Հայաստանից:
Օմսկում Հայաստանի քաղաքացու են սպանել՝ 32-ամյա Վահե Զալիբեկյանին: Չկանխամտածված սպանության կասկածանքով ձերբակալվել է բռնցքամարտիկ Նիկիտա Ֆեդոնենկոն: 22-ամյա մարզիկը ծեծի է ենթարկել 32-ամյա Զալիբեկյանին, որը ստացված վնասվածքներից մահացել է: Ֆեդոնենկոյի բնակարանի խուզարկության ընթացքում «ատրիբուտներ են հայտնաբերվել, որոնք նման են սափրագլուխների օգտագործած առարկաներին»:
Պետական այցով Հայաստան է ժամանել Մալթայի Ինքնիշխան Մարտական Ուխտի արքայազն եւ մեծ վարպետ Ֆրա Մեթյու Ֆեսթինգը: Այսօր նա հյուրընկալվել է նախագահական նստավայրում: Սերժ Սարգսյանն արքայազնին պարգեւատրել է Փառքի շքանշանով՝ Հայաստանի Հանրապետության եւ Մալթայի Ինքնիշխան Մարտական Ուխտի միջեւ միջպետական հարաբերությունների ամրապնդման եւ զարգացման, ինչպես նաեւ Հայոց ցեղասպանության ճանաչման գործում ներդրած նշանակալի ավանդի համար: Իսկ Հայաստանի նախագահը պարգեւատրվել է Մալթայի Ուխտի բարձրագույն պարգեւով՝ Մալթայի Ուխտի արժանիքների համար շղթայով: Մալթայի Ինքնիշխան Մարտական Ուխտի արքայազնը նաեւ այցելել է Ծիծեռնակաբերդ, ծաղիկներ խոնարհել անմար կրակի մոտ, նաեւ ծառ է տնկել Հայոց ցեղասպանության զոհերի հիշատակին:
Վարչապետ Կարեն Կարապետյանը հոկտեմբերի 20-ին խորհրդարանում խոսել էր Հայաստանում արդար, մրցունակ դաշտ ստեղծելու անհրաժեշտության մասին, նաեւ անդրադարձել տնտեսության ոլորտում մենաշնորհներին: Վարչապետը նշել էր, որ փոքրիկ շուկան այսպես թե այնպես հանգեցնում է մենաշնորհների առաջացմանը։ Այսօր թեման շրջանառվել է Ազգային ժողովի միջանցքներում:
Իսկ խորհրդարանի դահլիճում «Ժառանգություն»-ից Զարուհի Փոստանջյանն ապրիլյան պատերազմում կորցրած տարածքների հետ կապված հատուկ նիստ հրավիրելու կոչ է արել՝ ստեղծված իրավիճակի կապակցությամբ լուծումներ առաջարկելու նպատակով: Գալուստ Սահակյանը, սակայն, նման նիստի անհրաժեշտություն չի տեսնում:
ԲՀԿ-ական պատգամավորներն էլ խոսել են «Նաիրիտ»-ի մասին: Նաիրա Զոհրաբյանը կոչ է արել «քառօրյայից քառօրյա չգլորել խմբակցության ներկայացրած «Նաիրիտ»-ին վերաբերող օրինագիծը, այլ քննարկել եւ վերջնական լուծում տալ խնդրին՝ կա՛մ այս, կա՛մ այն կողմ: Միքայել Մելքումյանի հավաստմամբ էլ՝ օրինագծում այնպիսի մեխանիզմներ են առաջարկել, որոնք կօգնեն ներդրողներ գտնել:
78 տարեկանում մահացել է հայտնի կինոռեժիսոր, սցենարիստ Ներսես Հովհաննիսյանը: 1987 թվականին նա արժանացել է ՀԽՍՀ վաստակավոր գործչի կոչման, 2013-ին՝ «Հայակ» ազգային կինոյի մրցանակաբաշխության Հատուկ մրցանակի: Վերջին տարիներին Հովհաննիսյանը Մոսկվայում էր բնակվում, որտեղ էլ հողին կհանձնեն ռեժիսորի աճյունը: Ներսես Հովհաննիսյանը հանդիսատեսին հայտնի է «Հարսնացուն հյուսիսից», «Երջանկության մեխանիկա», «Խոշոր շահում», «Մենավոր ընկուզենի» եւ այլ սիրված ֆիլմերով:
Հոկտեմբերի 24-ին դոլարի փոխարժեքն աննշան աճել է, եվրոյինը՝ նվազել: Արդյունքում դոլարի փոխարժեքը կազմել է 475 դրամ, եվրոյինը՝ 517, ռուբլունը՝ 7 դրամ 64 լումա, ֆունտինը՝ 581 դրամ։
Հոկտեմբերի 25-26-ին հանրապետության տարածքի մեծ մասում՝ բացառությամբ Երեւանի, Արարատյան դաշտի, Արագածոտնի եւ Վայոց Ձորի նախալեռների, հիմնականում ձյուն է սպասվում, առանձին հատվածներում՝ բուք, ճանապարհներին՝ մերկասառույց եւ ցածր տեսանելիություն: Օդի ջերմաստիճանը կնվազի 8-10 աստիճանով: Երեւանում վաղն անձրեւ է սպասվում: