2016-ին Աֆղանստանում օփիումի արտադրությունն աճել է 43 տոկոսով՝ անցած տարվա նույն ժամանակահատվածի համեմատ։ Այս մասին ասվում է ՄԱԿ Թմրանյութերի ու հանցավորության հարցերով վարչության զեկույցում։ Ավելացել են նաեւ այն տարածքները, որտեղ օփիումային խաշխաշ է աճեցվում՝ նախկին 183 հազար հեկտարի փոխարեն դարձել է 201 հազար հեկտար։
«Զեկույցի տվյալները խոսում են այն մասին, որ Աֆղանստանում սկսել են ավելի քիչ ջանքեր գործադրել թմրադեղերի ապօրինի շրջանառության դեմ պայքարի ու դրան առնչվող խնդիրների լուծման ուղղությամբ»,- ասել է վարչության ղեկավար Յուրի Ֆեդոտովը։
Եվ այսպես, 2016-ին տեղի իշխանությունները 355 հեկտար օփիումային խաշխաշի ոչնչացման գործողություն են անցկացրել։ Դա 10 անգամ քիչ է, քան 2015-ին։ «Ես կոչ եմ անում միջազգային համայնքին ամրապնդել Աֆղանստանի կառավարության հետ համագործակցությունը ու ռեսուրսներ տրամադրել ավելի ակտիվ տարածաշրջանային համագործակցության համար,- հայտնել է Ֆեդոտովը,- Նաեւ անհրաժեշտ է ամրապնդել քաղաքական կամք հենց Աֆղանստանում՝ ոչ միայն թմրադեղերի, այլեւ կոռուպցիայի, փողերի լվացման ու այլ ֆինանսական հանցագործություններիր դեմ պայքարի համար»։
