ՀՀ քննչական կոմիտեի Երեւան քաղաքի քննչական վարչության Շենգավիթ վարչական շրջանի քննչական բաժնում քննվող քրեական գործով բացահայտվել է մշտական բնակության վայր չունեցող 51-ամյա տղամարդու սպանությունը։
2016թ. հոկտեմբերի 18-ին՝ ժամը 18:25-ին, ահազանգ է ստացվել առ այն, որ Երեւան քաղաքի Բագրատունյանց պողոտայի հասցեներից մեկում հայտնաբերվել է արական սեռի դի:
Անմիջապես դեպքի վայր է մեկնել քննչական-օպերատիվ խումբը. պարզվել է մահացած տղամարդու ինքնությունը, ով հանդիսանում է մշտական բնակության վայր չունեցող, 1965 թ. ծնված Վ.Ասլանյանը։ Դիակի զննությամբ դեմքի շրջանում հայտնաբերվել են քերծվածքներ։ Նույն օրը նշանակվել է դատաբժշկական փորձաքննություն։
Դիահերձման արդյունքների հիման վրա ստացված բժշկական տեղեկանքի համաձայն՝ տղամարդու մահվան պատճառ է հանդիսացել փակ, բութ գանգուղեղային վնասվածքը, հայտնաբերվել են նաեւ արյունազեղումներ, քթոսկրի կոտրվածք։
ՀՀ ՔԿ Երեւան քաղաքի քննչական վարչության Շենգավիթ վարչական շրջանի քննչական բաժնում հարուցվել է քրեական գործ, մշակվել քննչական պլան եւ ձեռնարկվել անհետաձգելի քննչական գործողություններ՝ պազրելու տղամարդու՝ կյանքի հետ անհամատեղելի մարմնական վնասվածքներ ստանալու հանգամանքները։ Արդյունքում՝ պարզվել են քրեական գործով էական նշանակություն ունեցող մի շարք հանգամանքներ, առերեւույթ հանցագործություն կատարած անձի ինքնությունը։
Ձեռք բերված բավարար ապացույցների համակցությամբ՝ 51-ամյա Վ.Ասլանյանի սպանության համար մեղադրանք է առաջադրվել Երեւանի 45-ամյա բնակչի: Վերջինս ընդունել է առաջադրված մեղադրանքը եւ ցուցմունք տվել դեպքի շուրջ։
Նախաքննությունը շարունակվում է: Միջոցներ են ձեռնարկվում՝ դեպքի բազմակողմանի,օբյեկտիվ եւ լրիվ քննությունն ապահովելու, ինպես նաեւ՝ շարժառիթը եւ դրդապատճառը պարզելու ուղղությամբ: