Հայաստանի նոր կառավարությունը կարճ ժամկետում հաջողություն գրանցելու համար պետք է գնա «կադրային ջարդի»: Այս մասին, այսօր՝ հոկտեմբերի 25-ին, լրագրողների հետ հանդիպման ժամանակ նշել է «ՓՄՁ աջակցություն ասոցիացիա» Հ/Կ-ի ղեկավար Հակոբ Ավագյանը:
«Այն մաքսավորը, որը սովոր է այն կյանքին, որով ինքն ապրում է, ինքը չի կարող վաղվանից փոխվել եւ դառնալ ուրիշ մաքսավոր»,-ասաց նա:
Հակոբ Ավագյանի խոսքով, բոլորովին կարիք չկա նորից սկսել ինչ-որ հետազոտություններ անել՝ պարզելու տնտեսության վիճակը. «Բազմաթիվ տնտեսական վերլուծություններ կան։ Դրանք պետք է պարզապես վերցնել՝ տեսնել ինչն է խնդիրը»։
Տնտեսագետը նկատել է, որ Հայաստանում գործող փոքր ու միջին ձեռնարկությունների 60 տոկոսը զբաղվում է առեւտրային գործունեությամբ. «Նրանց զարգացմանը կարող է նպաստել օրինակ՝ պետական գնումներում քվոտավորված տեղեր հատկացնելը, ինչը կաշխուժացնի տնտեսությունը»:
Իր հերթին տնտեսագետ Աշոտ Խուրշուդյանը նշեց, որ այս կառավարությունը ճգնաժամային կառավարություն է հիշեցնում. «Եթե նախկինում վարչապետ-նախարար պաշտոնը ընկալվում էր որպես իշխանություն, նվեր, լիազորություն, այս դեպքում կառավարությունը ընկալվեց, որ եկել է ինչ-որ բան անելու։ Գիտակցվում է, որ այն տնտեսական խնդիրները, որ ունենք, այո՝ կան եւ այս կառավարությունն էլ եկել է, որ ոչ ստանդարտ լուծումներ գտնվի խորը խնդիրներին, որոնց առաջ կանգնել ենք»: