Հայաստանում տնտեսական քաղաքականությունն ու հարկային քաղաքականությունը հակասում են իրար: Այս մասին, այսօր՝ հոկտեմբերի 25-ին, լրագրողների հետ հանդիպման ժամանակ նշել է տնտեսագետ Աշոտ Խուրշուդյանը:
Նրա խոսքով, Հայաստանի համար կարեւորը ներմուծման կամ առեւտրի խթանումը չէ. «Դրանց մասին մտածում է նաեւ պետությունը, որովհետեւ հարկերի մեծ մասը գոյանում է ներմուծումից եւ առեւտրից։ Այսինքն՝ այն, ինչ տնտեսության համար ձեռնտու չէ, բյուջեի համար ձեռնտու է, ու հարկային, մաքսային մարմիններն էլ ավտոմատ հարմարեցնում են։ Եթե կառավարությունը ցանկանում է այս ամենը վերացնել, ապա պլան հասկացությունն ընդհանրապես պետք է վերացնի։ Դա շատ մեծ ռիսկ է. պատրա՞ստ է այսօրվա կառավարությունը գնալ դրան, ես չգիտեմ, որովհետեւ կարող է պարզվել, որ, ի վերջո, բյուջեն չենք կարողանում կատարել: Քանի որ կոռուպցիայի դեմ չեն կարողանում պայքարել, որոշեցին այն օրինականացնել, այսինքն՝ մարդկանց տուգանքները մտցնել ֆոնդ եւ դրանով պարգեւավճար տալ. ընդամենը դա տեղի ունեցավ»,-ընդգծեց տնտեսագետը: