Կառավարության նոր ծրագրում կան հայեցակարգային ու հստակ դրույթներ եւ 6 ամիսը քիչ չէ կարեւոր փոփոխություններ իրականացնելու համար: Այս մասին այսօր՝ հոկտեմբերի 25-ին, լրագրողների հետ հանդիպմանն ասաց Հայաստանի գործատուների միության նախագահ Գագիկ Մակարյանը:
«Կարեն Կարապետյանի հայտարարություններից հետո կան հանձնարարականներ` օպտիմալացման, ներդրումների, ԾԻԳ-երի կրճատման վերաբերյալ եւ սրանց կատարումն արդեն դրական տեղաշարժ կլինի: Յուրաքանչյուր վարչապետ չի դառնա քավության նոխազ, եթե կատարի սահմանադրորեն իրեն տրված լիազորությունները եւ պարտականությունները»,- ասաց Գագիկ Մակարյանը՝ նշելով, որ Կարեն Կարապետյանն աչքի է ընկնում իր լիդերությամբ, իրավիճակին ուղիղ գնահատականներ տալու կարողությունով:
Գագիկ Մակարյանը տնտեսական քաղաքականության մեջ հաջողության հասնելու համար կարեւորեց կոռուպցիայի, ստվերի դեմ պայքարը. «Ստվերն այն դեպքում կվերանա, երբ շուկայում լինեն հավասար մրցակցային պայմաններ: Ես հավատում եմ, որ մեկ ամսում էլ կարելի է կոռուպցիան վերացնել: Կոռուպցիան թվում է շատ բարդ խնդիր, բայց նաեւ շատ հեշտ լուծելի է: Եթե բոլոր ղեկավարները, որոնք նշանակված պաշտոններ են զբաղեցնում, դադարեցնում են կոռուպցիայով զբաղվելը եւ դրա համար պատիժներ են սահմանվում, ապա կարճ ժամանակում հաջողության են հասնում»:
