Մոտ 100 մարդ՝ մեծամասնությունը Հարավային Քալիֆորնիայի հայկական եկեղեցիների ներկայացուցիչներ, հավաքվել էին Սոլվանգում լութերական եկեղեցու բակում՝ միսիոներուհի Մարիա Յակոբսենի հուշարձանի բացմանը։ Ազգության դանիացի Մարիա Յակոբսենը Օսմանյան Թուրքիայում Հայոց ցեղասպանության ժամանակ օգնել էր հայերին։

Անցած դարի սկզբին Մարիան մեկնել էր Օսմանյան կայսրություն որպես միսիոներական առաքելության անդամ։ Մարիան Ցեղասպանության ժամանակ մոտ 3 հազար երեխաների կյանք էր փրկել ու որդեգրել նրանցից երեքին։

Հուշարձանի վրա գրված է «Շնորհակալություն Մարիա «Մայրիկ» Յակոբսենին ու Դանիայի ժողովրդին։ Միշտ երախտապարտ՝ քո հայ բարեկամներ»,- հայտնում է Syvnews.com–ը։

Հուշարձանի բացմանը ելույթ էին ունեցել հայկական համայնքի ներկայացուցիչներ, այդ թվում նրանք, ովքեր անձամբ էին ճանաչում նրան։ Նրանցից մեկը Նշան Կուլուկյանն է, որը որբացել էր երկու տարեկանում ու ապրում էր Յակոբսենի մանկատանը։ «Մենք նրան մայր էինք անվանում, քանի որ նա միակ մայրն էր, ում մենք ճանաչում էինք այն ժամանակ»,- պատմում է Կուլուկյանը։

Նրա խոսքով, Մարիան չէր ուզում երեխաներին դանիացիներ դարձնել։ «Նա մեզ մեծացնում էր հայերի նման, ամեն օր հայերեն խոսելով ու մեզ սովորեցնելով հայկական եկեղեցու կանոնները»։

Վարդան Մելքոնյանը հիշեց, թե ինչպես է 4 տարեկանում հայտնվել մանկատանը, քրոջ ծնվելուց ընդամենը մի քանի օր հետո։ Քույրը անուն չուներ, Յակոբսենը աղջկան անուն էր տվել ու կնքել նրան։ Մելքոնյանը նշեց, որ շնորհակալ է Մարիային հոգատարության ու աջակցության համար, այն բանի համար, որ ինքը Բեյրութի փողոցներում լքված որբից Լոնդոնի բնակիչ է դարձել եւ ի վերջո՝ Թագավորակամն ֆիլհարմոնիկ նվագախմբի դիրիժոր։