Ոստիկանի նկատմամբ բռնություն գործադրելու մեջ մեղադրվող` «Հիմնադիր խորհրդարանի» անդամ Գեւորգ Սաֆարյանի գործով վկաներից 6-ը այս պահի դրությամբ կալանավորված է: Այս մասին այսօր՝ հոկտեմբերի 25-ին, Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանում ասաց Գեւորգ Սաֆարյանի փաստաբան Տիգրան Հայրապետյանը՝ նշելով, որ կալանավորված վկաներից 4-ը «Սասնա ծռեր» խմբի անդամ են, իսկ երկուսը՝ կալանավորված են «Սասնա ծռեր» խմբին օժանդակելու եւ Սարի թաղի անկարգություններին մասնակցելու մեղադրանքով:
«Այս պահին վկաներից 6-ը կալանավորված է՝ Հովհաննես Ղազարյանը, Կարո Եղնուկյանը, Սերգեյ Կյուրեղյանը, Գագիկ Եղիազարյանը, Սմբատ Բարսեղյան, Վարուժան Ավետիսյան: Վկաներից ազատության մեջ են Սեւակ Մանուկյանը, Արմեն Միքայելյանը, Վահագն Ղումաշյանը, Աղասի Հովակիմյանը, Սյուզաննա Սիմոնյանը, Վահրամ Պետորասյան, իսկ Գարեգին Չուքասզյան, պարզ չէ՝ ուր է: Այս պահին այսքան վկայից դատարանում է միայն Վահրամ Պետրոսյանը»,-ասաց փաստաբանը:
Դատարանը որոշում կայացրեց հետաձգել նիստը՝ հաջորդ նիստին մյուս վկաների ներկայությունը ապահովելու համար:
Հաջորդ դատական նիստը տեղի կունենա նոյեմբերի 10-ին:
Գեւորգ Սաֆարյանին մեղադրանք է առաջադրվել Քրեական օրենսգրքի 316-րդ հոդվածի 1-ին մասով:
Հիշեցնենք, որ Երեւանի Ազատության հրապարակում 2016թ. հունվարի 1-ին ընդդիմադիր «Նոր Հայաստանի» անդամների եւ ոստիկանների միջեւ բախումներ էին տեղի ունեցել: Պատճառը տոնածառի հագուստով մայրաքաղաքի փողոցներում շրջող ակտիվիստն էր: Երեք անձ բերման էր ենթարկել, այդ թվում՝ Գեւորգ Սաֆարյանը, որին հետագայում էլ կալանավորեցին:
Ըստ իրավապահ մարմինների` Գեւորգ Սաֆարյանը բռնություն է գործադրել Ոստիկանության 4-րդ հատուկ գումարտակի հրամանատար, ոստիկանության կապիտան Գեղամ Խաչատրյանի նկատմամբ: