Մալաթիայի նախկին թաղապետ Վահան Զատիկյանի որդու՝ 26-ամյա Սեդրակ Զատիկյանի սպանության գործով հերթական դատական նիստն այսօր՝ հոկտեմբերի 25-ին, հետաձգվել է: NEWS.am-ի հետ զրույցում Սեդրակ Զատիկյանի սպանության գործով մեղադրյալ Նարեկ Խաչատրյանի պաշտպան Վարդուհի Էլբակյանը նշեց, որ դատական նիստն արդեն երկրորդ անգամ հետաձգվում էՍեդրակ Զատիկյանի սպանությունը պատվիրելու համար 15 տարվա ազատազրկման դատապարտված Ստեփան Հակոբյանին՝ դատարան չներկայացնելու պատճառով: Փաստաբանը նշեց, որ ոստիկանության ուղեկցող գումարտակի աշխատակիցներին բանավոր կերպով «Դատապարտյալների հիվանդանոց» ՔԿՀ-ից տեղեկացրել են, որ Ստեփան Հակոբյանի առողջական վիճակը ծանր է եւ այդ պատճառով չեն կարող ներկայացնել դատարան: Սակայն, «Դատապարտյալների հիվանդանոց» ՔԿՀ-ից դատարանին չի ներկայացվել Ստեփան Հակոբյանի առողջական վիճակի վերաբերյալ որևէ բժշկական փաստաթուղթ:
Հաջորդ դատական նիստը տեղի կունենա նոյեմբերի 1-ին:
Հիշեցնենք, որ Ստեփան Հակոբյանը որոշ ժամանակ գտնվել է «Էրեբունի» ԲԿ-ում, այնուհետեւ՝ տեղափոխվել դատապարտյալների հիվանդանոց:
Ստեփան Հակոբյանին հարցաքննելու միջնորդություն ներկայացրել էր Նարեկ Խաչատրյանի պաշտան Վարդուհի Էլբակյանը:
Հիշեցնենք, որ ըստ մեղադրական եզրակացության՝ Նարեկ Խաչատրյանը Ստեփան Հակոբյանի հետ, նախնական համաձայնությամբ, նախկինում ունեցած վեճի պատճառով վրեժխնդիր լինելու նպատակով, Արսեն Առուշանյանին պատվիրել են սպանել Սեդրակ Զատիկյանին:
Նարեկ Խաչատրյանին մեղադրանք է առաջադրվել Քրեական օրենսգրքի 38-104-րդ հոդվածի 2-րդ մասի 8-րդ կետով: Նա կալանավորված է:
Ավելի վաղ հայտնել էինք, որ Մալաթիա-Սեբաստիա վարչական շրջանի նախկին թաղապետ Վահան Զատիկյանի տղան՝ 26-ամյա Սեդրակ Զատիկյանը սպանվել է 2006թ. հունիսի 22-ին Սեբաստիա եւ Տիչինա փողոցների խաչմերուկում՝ «ԱԿՍ» տեսակի ինքնաձիգից արձակված կրակոցների հետեւանքով: Նույն վայրում կրակոցներից մահացել է նաեւ անցորդ, 42-ամյա Կարինե Սարգսյանը:
Գործով 15 տարվա ազատազրկման է դատապարտվել Ստեփան Հակոբյանը, որը ԱԺ նախկին պատգամավոր Հակոբ Հակոբյանի (Լեդի Հակոբ) եղբորորդին է, որն ըստ մեղադրական եզրակացության՝ Նարեկ Խաչատրյանի հետ նախնական համաձայնությամբ Սեդրակ Զատիկյանի սպանությունը պատվիրել է Արսեն Առուշանյանին, որը դատապարտվել է ցմահ ազատազրկման։ Արսեն Առուշանյանը Նարեկ Խաչատրյանի գործով վկայի կարգավիճակում է, եւ կալանավայրում արտագնա նիստում կհարցաքննվի։