Մենք ուզում ենք տեսնել Հայաստանի եւ Ադրբեջանի նախագահների քաղաքական կամքը Ղարաբաղի հարցում բանակցություններում առաջ գնալու համար։ Այս մասին հոկտեմբերի 25-ին՝ Երեւանում կայացած մամուլի ասուլիսին, ասել է ԵԱՀԿ ՄԽ ամերիկացի համանախագահ Ջեյմս Ուորլիքը։
Անդրադառնալով ԱՄՆ պետքարտուղար Ջոն Քերրիի հայտարարությանը, թե ղարաբաղյան հակամարտության կարգավորման համար բացակայում է նախագահների քաղաքական կամքը, Ուորլիքը պատասխանեց. «Վերջին տարիներին մենք նկատել ենք, որ ԱՄՆ պետքարտուղար Ջոն Քերրին շատ մտահոգված է ղարաբաղյան հակամարտության խաղաղ կարգավորման հարցով։ Անցյալ տարի նա երկու նախագահներին հրավիրել էր Վիեննա ՌԴ արտգործնախարար Սերգեյ Լավրովի եւ Ֆրանսիայի պետքարտուղար Արլեմ Դեզիրի հետ, եւ քննարկումն արդյունավետ էր։ Մենք՝ ԱՄՆ–ը, այլ համանախագահների հետ պատրաստ ենք առաջ շարժվել բանակցային ճանապարհով»,– ասել է միջնորդը։
Ուորլիքի խոսքով՝ ԱՄՆ–ը վստահ է, որ նման հնարավորություն կա։ «Ինչպես ես ասել եմ Բաքվում, եթե ոչ հիմա, ապա ե՞րբ։ Ի՞նչ ենք մենք ուզում։ Մենք ուզում ենք տեսնել նախագահների քաղաքական կամքը, որպեսզի Ղարաբաղի հարցում բանակցություններում առաջ գնանք։ Ես վստահ եմ, որ այդ քաղաքական կամքով մենք կարող ենք առաջընթաց գրանցել»,– եզրափակել է Ուորլիքը։