Բրազիլիայի ոստիկանները Սան Պաուլոյում շուրջկալի ժամանակ բնակելի տան նկուղում մահճակալին կապված տղամարդու են հայտնաբերել: Այս մասին հայտնում է Daily Mail-ը:
Իրավապահ մարմիների վարկածի համաձայն՝ 36-ամյա Արմանդո դի Անդրադիին 20 տարի բանտարկված են պահել հայրն ու խորթ մայրը: Երբ նրան ոստիկանները հայտնաբերել են, նկարագրել են որպես հյուծված մարդու: Սենյակը, որտեղ նա պահվել է, ո՛չ պատուհան է ունեցել, ո՛չ արհեստական լուսավորություն, իսկ հատակը ծածկված էր կղանքով:
Երբ Անդրադիին հայտնաբերել են, նա ոչ մի բան չի խոսել, նույնիսկ չի կարողացել կռահել, որ նրանք ոստիկաններ են:
Նշվում է, որ տղան կորել է, երբ 16 տարեկան էր: Դրանից հետո նրա հայրն ու խորթ մայրը բոլոր հարցումներին պատասխանում էին, որ տղան տեղափոխվել է Բրազիլիայի այլ շրջան, եւ նրա մոտ ամեն ինչ նորմալ է: Հարեւաններից մեկի ենթադրությամբ՝ ծնողները նրան նկուղում են փակել այն պատճառով, որ նա սկսել էր ալկոհոլ օգտագործել:
Արմանդոյի հայրը՝ Ամանսիո դի Անդրադին, պնդել է, որ իր տղան ընտանիքը լքել է 18 տարեկանում, իսկ վերադարձել է միայն անցյալ շաբաթ: Այդ ժամանակ նա իբրեւ թե խնդրել է իրեն նկուղում փակել, որպեսզի ազատվի ալկոհոլային կախվածությունից: