«Սասնա ծռեր» խմբի անդամ Հովհաննես Հարությունյանի շահերի պաշտպանությամբ կրկին զբաղվելու է Արայիկ Պապիկյանը: NEWS.am-ի հետ զրույցում Արայիկ Պապիկյանը նշեց, որ Հովհաննես Հարությունյանը ցանկություն է հայտնել, որ ինքը շարունակի զբաղվել նրա շահերի պաշտպանությամբ:
Փաստաբանը նշեց, որ Հովհաննես Հարությունյանին այսօր է տեսակցել «Դատապարտյալների հիվանդանոց» ՔԿՀ-ում, պաշտպանյալի տրամադրությունը լավ է, սակայն, առողջական վիճակը վատ. «Հովհաննեսին պետք է վիրահատություն արվի, քանի որ նրա ոտքի վնասվածքը դեռ բուժված չէ: Թե ինչ պատճառներով այդ վիրահատությունը չի արվել, դեռ պարզ չէ: Այսօր եմ տեսակցել նրա, տրամադրությունը բարձր էր, մարտական էր տրամադրված, սակայն, առողջական վիճակը լավ չէ»:
Նշենք, որ Հովհաննես Հարությունյանի շահերի պաշտպանությամբ սկզբանական շրջանում զբաղվում էին փաստաբաններ Հայարփի Սարգսյանը, Արայիկ Պապիկյանը եւ Արա Ղարագյոզյանը, սակայն, տարաձայնություններ էին տեղի ունեցել, որի պատճառով Հովհաննես Հարությունյանը հրաժարվել էր Արայիկ Պապիկյանի պաշտպանությունից: Այժմ նրա շահերի պաշտպանությամբ չի զբաղվում Արա Ղարագյոզյանը:
Հովհաննես Հարությունյանին մեղադրանք է առաջադրվել Քրեական օրենսգրքի 219-րդ հոդվածի 3-րդ մասի 1-ին կետով (Շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելը կամ դրանք պահելը, որը կատարվել է կազմակերպված խմբի կողմից) եւ 235-րդ հոդվածի 3-րդ մասով (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, որը կատարվել է կազմակերպված խմբի կողմից): Նա կալանավորված է: