ՄԱԿ գլխավոր քարտուղար Բան Կի Մունը կոչ է արել ընդլայնել խաղաղ բանակցություններին կանանց մասնակցությունը ու նաեւ ամրապնդել նրանց պաշտպանությունը զինված հակամարտություններում։
«Նայեք Սիրիայի կամ Եմենի վերաբերյալ բանակցությունների լուսանկարները։ Բանակցային սեղանի շուրջ պատվիրակության կազմում լավագույն դեպքում մեկ կին է։ Եվ սա այն դեպքում, երբ կանայք ու աղջիկները շարունակում են տուժել խտրականություններից, որը խորանում է հակամարտությունների պայմաններում, դառնում են ծայրահեղական խմբավորումների, այդ թվում ԻՊ-ի ու «Բոկո Հարամի» իրագործած դաժան հանցագործությունների զոհերը»,- հայտնել է Բան Կի Մունը ՄԱԿ ԱԽ նիստի ժամանակ։
Բան Կի Մունը շեշտել է, որ ըստ վերջին հետազոտությունների՝ բանակցային սեղանի շուրջ կանանց ներկայության շնորհիվ խաղաղ համաձայնագրերը 35 տոկոսով ավելի ամուր են լինում, քան առանց նրանց մասնակցությամբ կնքվածները։
ՄԱԿ ԱԽ-ի բաց նիստն այսօր նվիրված է «Կանայք ու խաղաղությունն ու անվտանգությունը» թիվ 1325 բանաձեւի կատարման ընթացքին։
