Գերմանիայում հակաահաբեկչական գործողություններ են իրականացվել մի խումբ չեչենների դեմ, որոնց կասկածում են ահաբեկիչներին ֆինանսավորելու մեջ։ Ոստիկանությունը միաժամանակյա խուզարկություններ է իրականացրել 12 բնակարաններում, նաեւ փախստականների հանրակացարաններում՝ Թյուրինգիայում, Համբուրգում, Հյուսիսային Ռեյն Վեսթֆալիայում, Սաքսոնիայում ու Բավարիայում, հայտնել է DW–ը։

Գերմանական ոստիկանության համատեղ գործողությունները ձեռնարկվել են 2015 թվականից իրականացվող հետաքննության հիման վրա, որը սկսվել էր ՌԴ՝ չեչենական ծագումով 28-ամյա քաղաքացու նկատմամբ, ում կասկածում են ծանր հակապետական հանցագործություն ծրագրելու մեջ, քննության տվյալներով նա մտադիր էր Սիրիայում միանալ ԻՊ ահաբեկիչներին։

Հետաքննության ընթացքում կասկածներ են առաջացել, որ 21-31 տարեկան 10 չեչեն տղամարդ ու 3 կին ֆինանսապես աջակցում են ահաբեկիչներին։ Այդ չեչենները դիմել էին Գերմանիայում ապաստան ստանալու համար։

MDR հեռուստաընկերության տվյալներով Զուլ քաղաքում տվյալ գործի շրջանակում ձերբակալվել է մեկ մարդ, որը բազմահարկ շենքում էր բնակվում։ MDR-ի թղթակիցը հայտնել է, որ նրա բնակարանից առգրավել են անհայտ սպիտակ փոշի։ Թե ինչ նյութ է դա ՝ չեն հայտնում։ Ենթադրվում է, որ թմրանյութ է։

Ոստիկանները այս պահի դրությամբ ահաբեկչության անմիջական սպառնալիք չեն հայտնաբերել։