Էքստրասենս Անի Մաջնունյանի դատական նիստին այսօր՝ հոկտեմբերի 25-ին, հարցաքննվել է սպանված էքստրասենսի մայրը: Աջափնյակ եւ Դավիթաշեն վարչական շրջանների ընդհանուր իրավասության դատարանում կինը նշել է, որ իր աղջիկը մտերիմ հարաբերությունների մեջ է եղել գործով որպես վկա ներգրավված Աննա Միսակյանի հետ: Նա պատմել է, որ նրանք այնքան մտերիմ հարաբերությունների մեջ են եղել, որ էքստրասենսը Աննային անգամ ուղարկել է հաց գնելու. «Մի անգամ հեռախոսով խոսում էին, ասաց, որ Աննային ուղարկել է հաց առնելու»:
Նշենք, որ փաստը, որ Անի Մաջնունյանն ու Աննա Միսակյանը մտերիմ են եղել, դատավարության կողմերին զարմացրել է:
Հիշեցնենք, որ Անի Մաջնունյանի սպանության գործով վկա Աննա Միսակյանը իր ցուցմունքում նշել էր, որ սպանության օրը եղել է ամբաստանյալ Մուշեղ Մխիթարյանի հետ եւ որ նա է սպանել Անի Մաջնունյանին:
Հիշեցնենք, որ 2015թ. օգոստոսի 5-ին Երեւանի Մազմանյան 5 շենքի թիվ 20 բնակարանում հայտնաբերվել էր «6-րդ զգայարան» հաղորդաշարի էքստրասենս, 53-ամյա Անի Մաջնունյանի դին՝ բազմաթիվ ծակած-կտրած վնասվածքներով:
Սպանության մեջ մեղադրվում է 21-ամյա Մուշեղ Մխիթարյանը, որին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 8-րդ կետով (սպանություն` զուգորդված ավազակությամբ): Նա կալանավորված է, չի ընդունում իր մեղքը:
