ՄԱԿ-ը հաղորդագրություններ է ստացել այն մասին որ ԻՊ խմբավորման զինյալները հաշվեհարդար են տեսնում խաղաղ բնակիչների նկատմամբ Մոսուլի շրջակայքում, որի վրա գրոհել է Իրաքի բանակը՝ արևմտյան կոալիցիայի աջակցությամբ, հայտնում է BBC–ն։
Ծայրահեղականների գազանությունների մասին հաղորդագրություններ է ստացել ՄԱԿ մարդու իրավունքների հարցերով հանձնակատարի վարչությունը։ Զինյալների զոհերի շրջանում կան նաև երեխաներ։ Եվ այսպես, Սաֆինա գյուղում սպանվել է 15 խաղաղ բնակիչ, իսկ նրանց մարմինները գետն են նետվել։ Մեկ այլ դեպքում վեց խաղաղ բնակիչների կապել են մեքենային, որը նրանց քարշ է տվել փողոցով մեկ։ Հայտնի չէ՝ նրանք ողջ են մնացել, թե ոչ։
Մարդու իրավունքների հարցերով հանձնակատարի վարչությունում նաև հայտնել են, որ ըստ նոր տեղեկությունների՝ խաղաղ բնակիչներին որպես կենդանի վահան են օգտագործում։
