Եվրախորհրդարանի նախագահ Մարտին Շուլցը հույս չունի, որ ԵՄ ու Կանադայի միջեւ առեւտրատնտեսական համագործակցության մասին պայմանագիրը (CETA) կկնքվի նախանշված ժամկետում՝ հոկտեմբերի 27-ին։
ԵՄ- Կանադա գագաթնաժողովը, որտեղ նախատեսված էր CETA –ի ստորագրումը, ըստ Մարտին Շուլցի, ստիպված կլինեն հետաձգել։ Հաշվի առնելով համաշխարհային տնտեսության համար այդ իրադարձության նշանակությունը՝ Շուլցը ոչ մի ողբերգական բան չի տեսնում, որ պայմանագիրը նախանշված ժամկետից ավելի ուշ ստորագրվի։ «Եթե դրա համար մի երկու շաբաթ էլ պահանջվի, այդ դեպքում մենք գագաթնաժողովը այդքան ժամանակով կհետաձգենք»,- ասել է նա։
ԵՄ -Կանադա գագաթնաժողովի անցկացման ու CETA–ի ստորագրման վճռորոշ պայմանը պայմանագրի վավերացումն է Բելգիայի կառավարության կողմից։ Դրա համար պետք է փոխզիջման հասնել երկրի երեք ռեգիոններից երկուսի հետ, որոնք բոյկոտել են համաձայնագիրը։ Շուլցի խոսքով մինչեւ հոկտեմբերի 27-ը նման փոխզիջման հասնելու հավանականությունը այդքան էլ մեծ չէ։ «Բայց ես հավատում եմ, որ նրանք վերջիվերջո կպայմանավորվեն»- ամփոփել է նա։