Սան Ֆրանցիոսկոյի շրջանային դատարանը հաստատել է գերմանական Volkswagen կոնցեռնի ու ԱՄՆ մեքենայատերերի միջեւ «դիզելային սկանդալի» շուրջ խաղաղ համաձայնագիրը։ Ըստ պայմանագրի՝ 2 լիտր ծավալով շարժիչով 475 հազար դիզելային մեքենաների գնման համար հատկացվելու է մոտ 10 մլրդ դոլար։ Բացի դրանից Volkswagen–ը 4․7 մլրդ դոլար է փոխանցելու բնապահպանական հիմնադրամներին։ Ավտոմեքեները հետ կանչելու գործընթացը պետք է սկսվի 2016-ի նոյեմբերի կեսերին, հայտնում է DW–ն։
Սա ավտոարտադրողի կողմից փոխհատուցման ամենախոշոր գումարն է ԱՄՆ պատմության մեջ։ Ընդ որում ընկերությունը դեռ պետք է նույնատիպ համաձայնագիր կնքի նաեւ 3 լ ծավալով շարժիչ ունեցող Audi մեքենաների հարցով, որոնց քանակը 85 հազար է, նաեւ տուգանք վճարի ԱՄՆ արդարադատության նախարարությանը։
Հոկտեմբերի սկզբին հայտնել էին, որ Volkswagen –ը 1․2 մլրդ դոլար փոխհատուցում կվճարի ԱՄՆ ավտոդիլերներին, որոնց բիզնեսը տուժել է դիզելային սկանդալի պատճառով։