Հարավային Կորեայի դատախազությունը խուզարկություններ է կատարել ոչ առեւտրային հիմնադրամներում, որոնք, ենթադրաբար, կապ ունեն երկրի նախագահ Փաք Կըն Հեի մտերիմ ընկերուհու հետ: Այս մասին գրում է ՌԻԱ Նովոստին:
9 կառույցների, այդ թվում՝ Mir Foundation եւ K-Sports հիմնադրամներին, կասկածում են որոշ գործարար կորպորացիաներից 70 մլն դոլար հավաքագրելու համար: Այս միջոցները գաղտնի ուղարկվել են նախագահի մտերիմ Ցոյ Սուն Սիլին: Դատախազությունը խուզարկել է նաեւ նրա տունն ու Կորեացի արդյունաբերողների ֆեդերացիայի գրասենյակը:
Սեուլի դատախազների գործողությունները սկսվել են այն բանից հետո, երբ նախագահ Փաք Կըն Հեն հրապարակային ներողություն է խնդրել, որ նախագահական տասնյակ ելույթների տեքստեր Ցոյ Սուն Սիլին են հասել՝ մինչ դրանց հրապարակումը:
Այդ մասին առաջին հաղորդագրությունները տարածել է JTBC հեռուստաալիքը, որը կասկածներ է հայտնել պետական գործերին Ցոյ Սուն Սիլի մասնակցության շուրջ:
Նշվել է նաեւ, որ Սուն Սիլը նույնիսկ շտկումներ է մտցրել նախագահի ելույթների տեքստերում՝ չնայած դրանք գաղտնի են համարվել:
Սկանդալը հասունանում է, եւ Հարավային Կորեայում իշխող «Սենուրիդան» կուսակցության անդամները նախագահից պահանջում են լքել կուսակցությունը, իսկ ընդդիմությունը պնդում է կառավարության հրաժարականի հարցում: