ԱՄՆ նախագահ Բարաք Օբաման ճիշտ չի ասել՝ հավաստիացնելով, թե ինքը տեղյակ չի եղել նախկին պետքարտուղար Հիլարի Քլինթոնի կողմից համակարգչային անձնական սերվերը էլեկտրոնային փոստով ծառայողական նամակագրության համար օգտագործելու մասին: Այս մասին գրում է Gazeta-ն՝ վկայակոչելով WikiLeaks-ը:
Կազմակերպության Twitter-ի գրառման համաձայն՝ Քլինթոնի շրջապատի «նոր նամակները ցույց են տալիս, որ Օբաման ստել է, երբ հայտարարել է, որ տեղյակ չէր Քլինթոնի կողմից էլեկտրոնային փոստի մասնավոր հասցեի օգտագործման մասին»:
WikiLeaks-ը ներկայացրել է 2015 թվականի մարտի 7-ին Շերիլ Միլից Ջոն Պոդեսթային ուղղված նամակի բովանդակությունը: Միլը նախկինում ԱՄՆ պետքարտուղարի աշխատակազմի ղեկավարն էր:
Կազմակերպության մեջբերած նամակում այսպիսի տող է պարունակվում. «Մենք պետք է դա «մաքրենք». նա նրանից նամակներ ունի, որոնք էլփոստով են ուղարկվել, եւ դրանց վրա state.gov գրված չէ»:
Այս դոմենային անվանումն օգտագործվում է ԱՄՆ պետքարտուղարության կողմից: Դրանով են ավարտվում ԱՄՆ արտաքին քաղաքականության գերատեսչության աշխատակիցների ծառայողական էլեկտրոնային նամակների հասցեները:
