Ուռուցքաբանության ազգային կենտրոնում անցած տարվա մարտի 12-ին մահացած 61-ամյա Սվետլանա Պետրոսյանի գործով երրորդ դատաբժշկական հանձնաժողովային փորձաքննությունն է նշանակվել: Այս մասին NEWS.am-ի թղթակցին ասաց գործով տուժողի իրավահաջորդի ներկայացուցիչ Արայիկ Պապիկյանը:
«Կրկնակի դատաբժշկական փորձաքննությունը ստացվել է, սակայն մեր գնահատմամբ, այն թերի է, հարցերը կամ թերի, կամ մասնակի են պատասխանված, կամ ընդհանրապես չկա պատասխան: Անորոշ, լղոզված էր բժշկական սխալի պահը, թեեւ նշված էր մի տեղ, որ խախտում կա: Միջնորդեցինք երրորդ փորձաքննությունը նշանակվի, որի եզրակացությունը դեռ չի ստացվել»,- ասաց փաստաբանը:
Արայիկ Պապիկյանի խոսքով՝ երբ իրենք միջնորդություն էին ներկայացրել նոր փորձաքննության վերաբերյալ եւ պատասխանի էին սպասում, քննիչն առանց որեւէ մեկին հայտնելու կարճել էր քրեական գործը. «Հսկող դատախազն է վերացրել քննիչի որոշումը եւ ցուցում տվել նախաքննությունը շարունակել, որից հետո էլ արդեն փորձաքննությունը նշանակվեց»:
Ավելի վաղ հաղորդել էինք, որ 61-ամյա Սվետլանա Պետրոսյանի մոտ 2015թ. հունվարի 12-ին հայտնաբերվել էր կրծքագեղձի քաղցկեղ: Ուռուցքաբանության ազգային կենտրոնում կինը մարտի 2-ին քիմիաթերապիա էր ընդունել: Մահացածի որդին պնդում է, որ մայրն առանց լյարդի պատշաճ հետազոտության է ենթարկվել քիմիաթերապիայի, ինչի հետեւանքով լյարդային անբավարարության պատճառով 10 օր անց՝ մարտի 12-ին անց մահացել է:
Դեպքի առթիվ հարուցվել է քրեական գործ Քրեական օրենսգրքի 130-րդ հոդվածի հատկանիշներով, այն է՝ բժշկական օգնություն եւ սպասարկում իրականացնողների կողմից մասնագիտական պարտականությունները չկատարելուն կամ ոչ պատշաճ կատարելուն: