Իրավապահ մարմիններն արդեն 3 տարի է՝ չեն կարողանում հայտնաբերել Վանաձորում 15-ամյա Դավիթ Հովակիմյանի սպանությունը կատարած անձին կամ անձանց:
Դավիթը 2013թ. հոկտեմբերին Վանաձոր էր մեկնել՝ հանդբոլի Հայաստանի առաջնության եզրափակիչ մրցաշարին մասնակցելու համար: Նույն օրը երեկոյան նրան այգում դանակահարել են, հիվանդանոց տեղափոխվելուց կարճ ժամանակ անց նա մահացավ: Պատանու մահից ժամեր անց ոստիկանությունը հայտարարեց, որ սպանությունը կատարել է Վանաձորի բնակիչ, նախկինում դատապարտված Կարեն Կունգուրցեւը: Նրան մեղադրանք առաջադրվեց, նա կալանավորվեց: Ավելի քան երկու տարի տեւած դատավարությունից հետո դատարանը պարզեց, որ Կունգուրցեւը չի կատարել սպանությունը: Նա հենց դատարանից ազատ արձակվեց: Ի դեպ, արդարացման դատավճիռը կայացվել է դեռեւս ապրիլին: Վեց ամիս է անցել, սակայն նոր կասկածյալ չկա:
Նշենք, որ Վանաձորում լուրեր են շրջանառվում, որ սպանությունը կատարել է ԱԱԾ պաշտոնյայի որդին:
Ավելի վաղ հայտնել էինք, որ 2013թ. հոկտեմբերի 12-ին ժամը 18:00-ի սահմաններում Վանաձորում կենցաղային հողի վրա վիճաբանություն էր տեղի ունեցել, որի ժամանակ դանակահարվել էր Դավիթ Հովակիմյանը: Նա տեղափոխվել էր «Վանաձոր ԲԿ» ՓԲԸ, որտեղ ժամը 21:35-ին մահացել է: