Երկու տարվա ընթացքում Ֆիլիպինները կազատվի երկրում օտարերկրյա զորքերի ներկայությունից: Ըստ ՌԻԱ Նովոստիի՝ այս մասին հայտարարել է երկրի նախագահ Ռոդրիգո Դուտերտեն:
«Հաջորդող երկու տարիներին իմ երկիրը կազատվի օտարերկրյա զորքերից: Ուզում եմ, որ նրանք հեռանան»,- Տոկիոյում դասախոսության ժամանակ հայտարարել է Դուտերտեն, որի ելույթից հատվածներ է ցուցադրել TBS հեռուստաալիքը:
Ավելի վաղ նա հայտարարել էր, որ ժամանակն է, որ Ֆիլիպինները հրաժեշտ տա ԱՄՆ-ին: Սակայն ավելի ուշ Դուտերտեն ավելի մեղմ արտահայտությունների էր անցել՝ պարզաբանելով, որ իր երկիրը չի կարող խզել ԱՄՆ-ի հետ հարաբերությունները, այլ պարզապես Ֆիլիպինները «կարիք չունի իր քաղաքականությունը կապել ԱՄՆ-ի քաղաքականության հետ»: