Եվ հայկական կողմի տեղեկատվությունը, եւ ԵԱՀԿ Մինսկի համանախագահների հայտարարությունը փաստում են այն մասին, որ ԼՂ հարցի շուրջ տեղի ունեցող քննարկումներն ուղղված են զինադադարի ռեժիմն ամրապնդելուն: Այս մասին այսօր` հոկտեմբերի 26-ին, լրագրողների հետ հանդիպմանն ասաց ՀՅԴ «Հայ դատի ու քաղաքական հարցերի գրասենյակի» ղեկավար Կիրո Մանոյանը:
Նրա խոսքով` ԼՂ հարցի կարգավորման քննարկում, ըստ էության, տեղի չի ունենում եւ անհրաժեշտ է ստեղծել մթնոլորտ, որտեղ կարելի է խոսել հարցը կարգավորելու մասին. «ԼՂ խնդրի կարգավորմանը Ադրբեջանն է ընդդիմանում, հարցի կարգավորման ուղղությամբ կարգավորումներ չկան, չեն էլ լինի: Համանախագահողները միջնորդներ են այս հարցում, եւ իրենց բոլոր քայլերը հարցը կարգավորելուն է ուղղված լինելու, չեմ կարծում, որ իրենցից կարելի է սպասել, որ ինչ-որ մեկն ասի` սա մեղավոր է, սա այսպես է արել: Այժմ համանախագահողները սահմանին իրավիճակը համեմատում են քառօրյայի հետ եւ ասում են, որ իրավիճակը խաղաղ է, լավ է: Բայց մենք գիտենք, որ զինծառայողներ են զոհվում հակառակորդի կրակոցներից եւ սահմանին իրավիճակը խաղաղ չէ»:
Կիրո Մանոյանը նշեց, որ դեկտեմբերի սկզբին Ադրբեջանի եւ Հայաստանի արտգործնախարարների հանդիպմանը չի հետեւելու երկու երկրների նախագահների հանդիպումը, նրա խոսքով` երկու երկրների նախագահների հանդիպումը տեղի կունենա մինչեւ տարեվերջ. «Կարծում եմ, որ եթե արտգործնախարարները հանդիպեն դեկտեմբերի սկզբին, դրան չի հետեւելու երկու երկների նախագահների հանդիպումը, նախագահների հանդիպում տարեվերջից շուտ տեղի չի ունենա»: