Սիրիայում ապրող հայ համայնքը, չնայած պատերազմին, շարունակում է ապրել իր առօրյայով: Այս մասին այսօր` հոկտեմբերի 26-ին, լրագրողների հետ հանդիպմանն ասաց ՀՅԴ «Հայ դատի ու քաղաքական հարցերի գրասենյակի» ղեկավար Կիրո Մանոյանը: Նա նշեց, որ այն հայտարարությունները, թե հայ համայնքի իշխանությունները փորձում են անգամ արյան գնով սիրիահայերին պահել Սիրիայում, չեն համապատասխանում իրականությանը:
«Սիրիայում իրավիճակը շարունակում է ծանր մնալ, այնտեղ հայ համայնքի կյանքը շարունակվում է` հակառակ այն ռմբակոծություններին, որոնք մերթ ընդ մերթ հասնում են հայկական թաղամասեր: Հակառակ դրան, հայ համայնքը միջոցառումներ է իրականացնում, ապրում իր առօրյայով: Այն հայտարարությունը, թե համայնքի իշխանությունները ամեն գնով փորձում են սիրիահայերին պահել այնտեղ, անհեթեթություն է: Նրանք, որոնք ուզում են դուրս գալ, գալիս են Հայաստան, իսկ նրանք, որոնք ուզում են մնալ, նրանց հայկական կողմն աջակցում է: Բայց պետք է նշել, որ հայության մնալը Մերձավոր Արեւելքում` կարեւոր է»,– ասաց նա։