Էջմիածնում այսօր՝ հոկտեմբերի 26-ին, «Իմպերիալ Տուր» ՍՊԸ-ի տարածքից Վաղարշապատի հիվանդանոց տեղափոխված տղամարդն ունի ոտքի կոտրվածք: NEWS.am-ին հիվանդանոցից տեղեկացրին, որ Էջմիածնի 48-ամյա բնակիչ Վարազդատ Վ.-ն իրենց մոտ է տեղափոխվել ժամը 12:00-ի սահմանում, նա ունի ոտքի կոտրվածք, կատարվել է կմախքային ձգում, այս պահին տղամարդու վիճակը բավարար է գնահատվում:
Նշենք, որ ըստ shamshyan.com-ի՝ «Իմպերիալ Տուր» ՍՊԸ-ի տարածքում աղբով բարձված «Камаз» մակնիշի մեքենայի վարորդը ավտոմեքենան շարժի է դրել, սակայն ինքնաբերաբար մեքենան առաջ է ընթացել եւ նա սեղմվել է դիմացում գտնվող երկաթե կոնստրուկցիաների մեջ։ Նրան ավտոմեքենայից դուրս են բերել քաղաքացիները։