Հայաստանում 2003-2015 թվականներին Վերակառուցման եւ զարգացման եվրոպական բանկի կողմից խորհրդատվության մասով 1200 ծրագրեր են իրականացվել ՓՄՁ-ների հետ: Այս մասին այսօր՝ հոկտեմբերի 26-ին, լրագրողների հետ հանդիպման ժամանակ նշել է ՎԶԵԲ-ի ՓՄՁ ֆինանսավորման եւ զարգացման խմբի խորհրդատվություն Փոքր բիզնեսների Հայաստանում ծրագրի ղեկավար Տիգրան Աղաբեկյանը:
Նրա խոսքով, այդ ընթացքում 133 մլն եվրոյի վարկավորում է եղել ՓՄՁ-ների համար: «Ոչ թե ՎԶԵԲ-ի կողմից է եղել ֆինանսավորումը, այլ ՎԶԵԲ-ի խորհրդատվության շնորհիվ փոքր ու միջին ձեռնարկությունները հնարավորություն են ստացել ֆինանսավորում ստանալ տարբեր վարկային եւ ֆինանսական կազմակերպություններից»,-ասաց նա:
Տիգրան Աղաբեկյանը նշեց, որ իրենք ունեն գործիք, որի օգնությամբ մեկ տարի անց չափում են, թե ինչ արդյունք է տվել ՓՄՁ-ներին այդ համագործակցությունը. «Կարող եմ արձանագրել, որ մոտ 94 տոկոսի դեպքում արդյունավետ է եղել ծրագրի իրականացումը: Վիճակագրություն չունենք, թե այդ մեկ տարուց հետո արդյոք որեւէ ընկերություն փակվել է: Գրեթե բոլորը հաջողակ են եղել, կամ առնվազն շարունակել են գործել»: