Հայաստանը հարկային թափանցիկություն ունեցող երկիր չէ։ Այս մասին, այսօր՝ հոկտեմբերի 26-ին, լրագրողների հետ հանդիպման ժամանակ նշել է Վերակառուցման եւ Զարգացման Եվրոպական Բանկի Երեւանյան գրասենյակի ղեկավար Մարկ Դեւիսը:
Նրա խոսքով, եթե Հայաստանում փոքր ու միջին ձեռնարկությունները ցույց տան իրենց բոլոր եկամուտները, մրցունակ չեն լինի շուկայում. «Եթե դուք եկամտաբերություն եք ցույց տալիս, վախենում եք, որ ձեր հետեւից կընկնեն»,-ասաց նա:
Մարկ Դեւիսը խուսափեց պատասխանել հարցին, թե Հարկային նոր օրենսգիրքը, ընդհանրապես հարկային ու մաքսային կարգավորումները որքանով են նպաստում կամ խոչընդոտում ՓՄՁ-ներին, նշելով, որ չի մասնակցել Հայաստանի նոր հարկային օրենսգրքի մշակման աշխատանքներին:
Այդուհանդերջ Մարկ Դեւիսը նշեց, որ Հայաստանի համար խիստ կարեւոր է հարկային եւ մաքսային վարչարարության բարելավելու խնդիրը. «Պետք է կարողանաք դաշտը մաքրել: Այդ առումով նոր կառավարության մտադրությունները ողջունելի են, այդ միջոցառումները պետք է թույլ տան, որ դուք դաշտը մաքրեք։ Պետք է ունենաք նաեւ տեխնիկական կարողություններ դաշտը մաքրելու համար։ Բացի այդ, անհրաժեշտ է ժամանակ ունենալ այդ ամենն իրականացնելու համար, արագ ոչինչ չի լինի: Սա ինստիտուցիոնալ փոփոխությունների հարց է, իշխանությունների կամքի հարցն է եւ իհարկե, քվեարկողները պետք է իրենց խոսքն ասեն։ Մենք ուրախ ենք, որ կառավարությունում քննարկում են այս բոլոր հարցերը»,-ասաց նա:
