Հիմա էլ կրկեսի վերածելու հայրենիք չունենք, հիմա գալիս է սիրո, համերաշխության ու ներողամտության ժամանակաշրջանը: Այս մասին այսօր՝ հոկտեմբերի 26-ին Ազգային ժողովում լրագրողների հետ զրույցում հայտարարել է
ԱԺ նախագահի տեղակալ, ՀՀԿ խոսնակ Էդուարդ Շարմազանովն՝ անդրադառնակով Գագիկ Ծառուկյանի քաղաքականություն վերադառնալու այսօրվա հայտարարությանը:
Ինչ վերաբերում է Ծառուկյանի բիրտ եւ հիշաչար չլինենուն, Շարմազանովը ընդհանրական պատասխան տվեց՝ ասելով, որ ավելի լավ է լինել բարի, լինել սիրո մեջ, լինել ներողամիտ, քան լինել չար եւ նենգ:
«Այո, եւս մեկ անգամ կրկնեցի, շատ ավելի լավ է լինել սիրո, բարության եւ ներողամտության կրող, քան թե լինել զոռբայության եւ նենգության կրող: Երկրորդ, որտեղ կա սեր, ներողամտություն եւ բարություն, ես այնտեղ եմ, որտեղ կա նենգություն, զոռբայություն եւ բիրտություն, ես դրան դեմ եմ»,- ասաց Շարմազանովը:
Անդրադառնալով ՀՀ նախագահ Սերժ Սարգսյանի այն հայտարարությանը, որ կրկեսի վերածելու հայրենիք չունենք, Շարմազանովը նշեց. «Մենք գնահատական հնչեցրել ենք բացառապես երեւույթների հետ կապված: Մենք, այո, թատրոնի և կրկեսի վերածելու հայրենիք չունենք: Հիմա անցյալում են նեգության եւ չարության ժամանակները, հուսով եմ, ներկան եւ ապագան կլինի սիրով եւ ներողամտությամբ»:
Հիշեցնենք, որ ՀՀ նախագահ ՍերԺ Սարգսյանը 2015-ի փետրվարի 12-ին ՀՀԿ խորհրդի նիստում ունեցած ելույթի ժամանակ հայտարարել էր, որ Գագիկ Ծառուկյան քաղաքական դերակատարը երկրի համար դարձել է չարիք, եւ որ կրկեսի վերածելու հայրենիք չունենք: Նա նաեւ Ծառուկյանին ազատել էր Ազգային անվտանգության խորհրդի անդամի կարգավիճակից, խոստացել, որ գործընթաց է սկսվելու Ծառուկյանի՝ ԱԺ նիստերից պարբերաբար բացակայելու կապակցությամբ:
Դրանից հետո Ծառուկյանը դուրս էր եկել քաղաքականությունից, լքել ԲՀԿ նախագահի պաշտոնը՝ հայտարարելով, որ հեռանում է քաղաքականությունից, քանի որ չի ցանկանում, որ արյուն թափվի:
