Ազգային ժողովի «Օրինաց երկիր» խմբակցության պատգամավոր Հովհաննես Մարգարյանը կարծում է, որ Հայաստանում գողություն են կատարում աշխատանք չունեցող անձինք, որոնք ապրում են սոցիալապես ծայրահեղ ծանր պայմաններում:
«Մարդը ստիպված կամ պետք է հեռանա երկրից, կամ գա քաղաք՝ աշխատանք գտնելու: Եթե սովամահ է լինում, ստիպված դիմում է գողության, որ մի կտոր հաց վաստակի»,- այսօր՝ հոկտեմբերի 26-ին, Ազգային ժողովում հայտարարեց ՕԵԿ-ական պատգամավորը:
Հովհաննես Մարգարյանի այս հայտարարությունը կարծես հունից հանեց ՀԱԿ խմբակցության պատգամավոր Գագիկ Ջհանգիրյանին: Իր ելույթի սկզբում պատգամավորը նշեց, որ խոսելու մտադրություն չուներ, սակայն Մարգարյանի հայտարարությունը ստիպեց դա անել:
«Իմ գործընկերը գողությունը որպես հափշտակության տեսակ բերեց կապեց աղքատության հետ: Ես այստեղ որոշեցի ելույթ ունենալ. հարյուրավոր ուսումնասիրություններ ապացուցում են հակառակը: Գողություն, հափշտակություն կատարողներից շատերը ոչ թե աղքատներ են, այլ լավ էլ նյութապես ապահոված են, ունեւոր ընտանիքներից են: Մենք հիմա վիրավորում ենք, ասում ենք՝ աղքատ մարդը պոտենցիոլ գողություն կատարող է: Բայց ընդհակառակն է, աղքատ մարդն ավելի հպարտ է, ավելի սկզբունքային է, չի շողոքորթել, չի քծնել, դրա համար էլ աղքատ է մնացել: Ինչո՞ւ եք աղքատին ասում, որ աղքատ է, ստիպված գողություն է անում»,- ասաց Գագիկ Ջհանգիրյանը:
Նախկին գլխավոր դատախազի տեղակալի կարծիքով՝ շատ հաճախ գողություն են կատարում ունեւորների զավակները, որպեսզի թմրանյութի գումար հայթայթեն: Ավելին, Ջհանգիրյանը նշեց, որ ինքը կարող է հարյուրավոր նման օրինակներ ներկայացնել. «Ներկա պաշտոնատար անձանց զավակների մասին էլ անուններ կարող եմ տալ, ինչո՞ւ եք բերում աղքատին կապում»: