Գագիկ Ծառուկյանը պետք է որոշում կայացնի ու իր հայտարարությունները համեմատի, որ որոշում կայացնելը համահունչ լինի: Այս մասին NEWS.am-ի հետ զրույցում ասել է ՀՀԿ խմբակցության ղեկավար Վահրամ Բաղդասարյանն՝ անդրադառնալով Գագիկ Ծառսւկյանի՝ քաղաքականության էջը նորից բացելու հայտարարությանը:
«Պետք չէ շտապել, սպասենք տեսնենք զարգացումներին: Ծառուկյանը պետք է որոշի»,-ասաց նա:
Հարցին, թե ի՞նչը դրդեց Ծառուկյանին նորից վերադարձնել քաղաքական դաշտ, երբ Սերժ Սարգսյանը հայտարարել էր՝ կրկեսի վերածելու հայրենիք չունենք եւ որ Ծառուկյան դերակատարը քաղաքական չարիք է, Վահրամ Բաղդասարյանն արձագանքեց. «Խոսքը վերաբերել է երեւույթին, ոչ թե անձին: Քաղաքական դաշտում յուրաքանչյուրն ունի իր դերակատարությունը»:
ՀՀԿ խմբակցության ղեկավարն անդրադարձավ նաեւ ԲՀԿ նախկին առաջնորդի այն հայտարարությանը, որ բարի է եւ ներել է բոլորին. «Քաղաքական դեբատների ժամանակ պետք է թշնամանա՞ն իրար հետ: Համոզված եմ, որ Ծառուկյանի սեղանի գիրքն էլ Աստվածաշունչն է եւ երբ խոսքը վերաբերում է վիրավորանքներին, պետք է լինի մեծահոգի եւ դիտարկի քաղաքական ասպարեզում, ոչ թե անձնական հարթությունում»:
