Բելառուսի հետ տրանսպորտի ոլորտում կա համագործակցության հարուստ փորձ: Այս մասին, այսօր՝ հոկտեմբերի 26-ին, Հայաստանում Բելառուսի արտակարգ եւ լիազոր դեսպան Իգոր Նազարուկի հետ հանդիպման ժամանակ նշել է ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը:
Գյուղնախարարությունից NEWS.am-ին հայտնում են, որ ողջունելով դեսպանին՝ Վ. Մարտիրոսյանը նշեց, որ Հայաստանի եւ Բելառուսի միջեւ հատկապես տրանսպորտի ոլորտում կա համագործակցության հարուստ փորձ եւ համոզմունք հայտնեց, որ հետագա աշխատանքները եւս արդյունավետ կլինեն։
Անդրադառնալով ՏՏ ոլորտի զարգացման հնարավորություններին՝ նախարարն առաջարկեց քայլեր ձեռնարկել այս ոլորտում երկու երկրների միջեւ համատեղ իրականացվող ծրագրերն ընդլայնելու եւ զարգացնելու ուղղությամբ։
Իգոր Նազարուկը, շնորհավորելով Վ. Մարտիրոսյանին նախարարի պաշտոնում նշանակվելու կապակցությամբ, հույս հայտնեց, որ տրանսպորտի, կապի եւ տեղեկատվական տեխնոլոգիաների ոլորտում երկու երկրների միջեւ առկա սերտ համագործակցությունն առաջիկայում էլ ավելի կամրապնդվի:
Հանդիպման ընթացքում քննարկվեցին նաեւ Հայաստանից Բելառուս եւ հակառակ ուղղությամբ իրականացվող բեռնափոխադրումների եւ ուղեւորափոխադրումների, ճանապարհաշինության, կապի եւ հեռահաղորդակցության ոլորտներին առնչվող, ինչպես նաեւ փոխադարձ հետաքրքրություն ներկայացնող մի շարք այլ հարցեր: