Հարավային Կովկասում Եվրամիության ներկայացուցիչ Հերբերտ Զալբերը հուսով է, որ ԵԱՀԿ Մինսկի խմբի բանակցությունները կհանգեցնեն Լեռնային Ղարաբաղի հակամարտության կողմերի առաջնորդների հանդիպման համաձայնության: Բաքվում այցով գտնվող Զալբերն այս մասին հայտնել է Trend-ի հետ էքսկլյուզիվ հարցազրույցում:
«ԵՄ-ը հարգանքով է վերաբերվում ԵԱՀԿ Մինսկի խմբի գործունեությանը, սակայն ԵՄ-ը նաեւ ցանկանում է տեղեկացված լինել այս գործընթացի մասին, հատկապես այդ պատճառով եմ ես այստեղ եւ ղեկավարության հետ քննարկում եմ իրավիճակը, իսկ անցյալ շաբաթ նույն նպատակով Երեւանում էի»,- ասել է Զալբերը:
Զալբերի խոսքով՝ տարածաշրջանային այցի ընթացքում իր ստացած ազդակները հույս են ներշնչում, որ գործընթացն առաջ է շարժվում: «Եթե իմ տպավորությունը ստույգ է, ինչ-որ համաձայնությունների կհասնեն եւ փոխզիջումային լուծումներ կգտնվեն»,- ասել է Զալբերը:
Նա նշել է, որ ԵՄ-ը տարիներ շարունակ ծրագրեր է առաջ մղում քաղաքացիական հասարակության համար՝ «Եվրոպական գործընկերություն հանուն Լեռնային Ղարաբաղի հակամարտության խաղաղ կարգավորման» (EPNK):
«Այսօր մենք սկսում ենք այդ ծրագրի հերթական փուլը, որն ուղղված է շփման գծի տարբեր կողմերում գտնվող մարդկանց համախմբմանը, մենք պատրաստ ենք միասին խոսել խաղաղ կյանքի, այդ նպատակին հասնելու հեռանկարների մասին»,- ասել է նա:
Զալբերի խոսքով՝ ԵՄ-ն այդ նախագծին նոր բյուջե է հատկացրել եւ նոր առաջարկներ, նոր նախագծեր ունի՝ ուղղված մարդկանց համախմբմանը, որոնք պետք է կատարելապես իրականացվեն այս տարեվերջին:
