Յուրաքանչյուր գումար կարելի է խելամիտ ծախսել: Այս մասին այսօր՝ հոկտեմբերի 26-ին, Ազգային ժողովում լրագրողների հետ զրույցում ասել է ՀՀ ֆինանսների նախարար Վարդան Արամյանը՝ պատասխանելով հարցին, թե ի՞նչ է լինելու ֆինանսների նախարարության «Դիլիջան» ուսումնական կենտրոնի ճակատագիրը եւ հնարավո՞ր է վաճառվի շենքը կամ աճուրդի հանվի:
«Ինչ վերաբերում է կենտրոնին, ասեմ, որ դա ՊՈԱԿ է, որը կամ լուծարվում է կամ վերաիմաստավորվում է, վաճառքի չի հանվում: Ես կարծում եմ, որ մենք գնալու ենք այն ճանապարհով, որ լուծարենք, որովհետեւ մենք ունենք խնդիր, որ ուսումնական հաստատությունները քիչ են աշխատում պետության հետ: Դա նրանից է, որ մենք ստեղծում ենք կառույցներ, որոնք արդյունավետ չեն աշխատում պետության հետ»,-ասաց նախարարը:
Հարցին, թե շենքի ներսում առկա թանկարժեք կահույքը, շենքն ու շինությունն ինչ ճակատագրի են արժանանալու, Արամյանը պատասխանեց. «Դա պետք է հանձնվի պետական գույքի կառավարման վարչությանը, որն էլ ունի հաստատված ծրագիր, բայց նույն ծառայությունը մտադիր եմ անել նաեւ այլ ուսումնական հաստատությւոնների միջոցով: Ես կարծում , որ կարելի է ավելի խելամիտ մոտենալ գումարին»,-ասաց նախարարը: Հարցին՝ փաստորեն առանց այդ շենքի էլ հնարավոր էր ուսումնական գործընթացն իրականացնել, նախարարն ասաց. «Ես ուզում եմ ասել՝ ես այդպես եմ մտածում , իմ մոտեցումներն այն են, որ յուրաքանչյուր գումար պետք է ավելի խելամիտ ծախսել»:
