Հայաստանում գործազրկության մակարդակն աստիճանաբար աճում է: Այս մասին այսօր՝ հոկտեմբերի 26-ին, Ազգային ժողովում հայտարարել է «Օրինաց երկիր» խմբակցության քարտուղար Մհեր Շահգելդյանը:
Նրա խոսքով՝ Աշխատանքի միջազգային կազմակերպության տվյալների համաձայն՝ Հայաստանում իրավիճակը վատանում է Եվրասիական տնտեսական միությանն անդամակցելուց հետո: Անդրադառնալով «Նաիրիտ» գործարանի վերագործարկման խնդրին՝ Մհեր Շահգելդյանը նշել է. «2015 թվականին «Նաիրիտ» ՓԲԸ-ն ներկայացրել է վերագործարկման ռազմավարական ծրագիր: Դա կարեւոր մոտեցում է, որի հիման վրա կարելի է նաեւ ներդրողների հետ աշխատել: Ինչպիսի՞ն է այս ծրագրի վերաբերյալ կառավարության դիրքորոշումը»:
Ի պատասխան վարչապետ Կարեն Կարապետյանն ինքն է պատգամավորին հարց ուղղել. «Դուք ծանո՞թ եք այդ ծրագրին: Մենք պայմանավորվել ենք մեր կայքում հրապարակել այդպիսի բոլոր ծրագրերը, որպեսզի յուրաքանչյուր քաղաքացի կարողանա դրանց հետ ծանոթանալ: Մենք չենք կարող պատասխանել գոյություն չունեցող ծրագրին»: