Տավուշի մարզի Մովսես գյուղում 2015թ. սեպտեմբերի 18-ին Բերդի տարածաշրջանի զինկոմ Դերենիկ Պապյանի սպանության համար Վերաքննիչ դատարանի որոշմամբ 14 տարվա ազատազրկման դատապարտված Արթուր Մկրտումյանի պաշտպանը վճռաբեկ բողոք է ներկայացրել:
Նշենք, որ Տավուշի մարզի ընդհանուր իրավասության դատարանը Մկրտումյանին 11 տարվա ազատազրկման էր դատապարտել: Սպանված զինկոմի հարազատները, սակայն, հարազատները համաձայն չէին առաջին ատյանի վճռի հետ եւ վերաքննիչ բողոք էին ներկայացրել` պահանջելով վերաորակել մեղադրանքը: Վերաքննիչը չէր վերաորակել, սակայն պատժաչափն ավելացրել է եւս երեք տարով:
Ավելի վաղ հայտնել էինք, որ 2015թ. սեպտեմբերի 18-ին ժամը 21:00-22:00-ն ընկած ժամանակահատվածում, Տավուշի մարզի Մովսես գյուղում վիճաբանության ժամանակ, 41-ամյա Արթուր Մկրտումյանն իր 16 մմ տրամաչափի երկփողանի որսորդական ողորկափող հրացանով կրակել էր Դերենիկ Պապյանի պարանոցին, ինչի հետեւանքով վերջինս մահացել է:
Արթուր Մկրտումյանին մեղադրանք է առաջադրվել Քրեական օրենսգրքի 104-րդ հոդվածի 1-ին մասով: Նա կալանավորվել է:
