Նիդեռլանդների վարչապետ Մարկ Ռյուտտեն հաստատել է, որ իր երկիրը չի աջակցի ԵՄ հետ Ուկրաինայի ասոցացման մասին համաձայնագիրը, հայտնում է Bild–ը։ Այսպիսով, չորս տարվա բանակցություններից հետո, հոլանդացիների մերժման պատճառով այս համաձայնագիրը, որի հաստատման համար անհրաժեշտ է ԵՄ բոլոր անդամների միաձայն աջակցությունը, հայտնվել է ձախողման շեմին,գրում է թղթակից Յուլիան Ռյոպկեն, նկատելով, որ դեպի Եվրոպա Ուկրաինայի ձգտման անուղղակի հետեւանքն է եղել «գրեթե 10 հազար զոհը»։
«Սա Կրեմլի համար հսկայական հաղթանակ է»,- գրում է լրագրողը։ Համաձայնագիրը միշտ էլ Ռուսաստանի "կոկորդին է եղել կանգնած»։ Դրա կնքումը կանխելու համար Մոսկվան հաշտվել է նույնիսկ տնտեսական պատժամիջոցների հետ։
Հոլանդիայի մերժմանը, հիշեցնում է հեղինակը, նախորդել է 2016-ի ապրիլի 6-ի հանրաքվեն, որի ժամանակ որոշվում էր ԵՄ ու Ուկրաինայի միջեւ ասոցացման մասին համաձայնագրին աջակցության հարցը։ Հանրաքվեին եկածների մեծ մասը դեմ էր քվեարկել։
Չնայած հանրաքվեի մասնակիցների 61 տոկոսը դեմ է քվեարկել, բայց մասնակցությունն ընդամենը 32 տոկոս է կազմել, այսինքն ասոցացիայի հակառակորդների թիվը կազմել է ընդամենը 2․5 մլն Հոլանդիայի 16․8 մլն բնակչությունից։ Բացի դրանից հանրաքվեի արդյունքները պարտադիր չեն կատարման համար, նշում է հեղինակը։
Ռյոպկեն նշում է, որ «Ուկրաինայի դեմ եւ ի օգուտ Ռուսաստանի Հոլանդիայի կառավարության կայացրած որոշումը անհասկանալի հակասություն է՝ մանավանդ ռուսական ՀՕԿ Բուկ համալիրով 2014-ի հուլիսին մալայզիական ավիաուղիների ոչնչացման միջադեպի ֆոնին»։ Այն ժամանակ «պուտինյան դահիճների կողմից սպանվեցին 196 հոլանդացիներ՝ ավելի շատ քան որեւէ այլ երկրի քաղաքացիներ», գրում է Bild-ը։
ԵԱՀԿ նախկին կանադացի դիտորդ Մայքլ Մաքքերը Ռյուտտեի որոշումը մեկնաբանել է հետեւյալ ձեւով՝ «Վլադիմիր Պուտինը կարող է ներխուժել Եվրոպա, սպանել 193 հոլանդացիների MH17-ում ու միաժամանակ հույս ունենալ, որ Հոլանդիայի վարչապետ Տյուտտեն կթքի ուկրաինցիների վրա հանուն նրա։ Ուաու»։
