ՄԱԿ գլխավոր քարտուղար Բան Կի Մունը դատապարտել է Քվետտա պակիստանյան քաղաքի ոստիկանական ակադեմիայի վրա ահաբեկչական հարձակումը։
Լրատվամիջոցների հաղորդագրություններով զինյալները գրոհով գրավել են ակադեմիան, ինչի հետեւանքով զոհվել է առնվազն 60 մարդ ՝ մեծ մասը ակադեմիայի կուրսանտներ։ Եվս ավելի քան 100 մարդ վիրավորում է ստացել։
ՄԱԿ գլխավոր քարտուղարը ցավակցել է զոհերի ընտանիքներին, Պակիստանի կառավարությանն ու ժողովրդին, նաեւ շուտափույթ ապաքինում մաղթել վիրավորներին։ Նա կոչ է արել անհապաղ գտնել մեղավորներին ու նրանց պատասխանատվության կանչել։
Պակիստանում ՄԱԿ հումանիտար համակարգող Անջելա Քիրնին ոստիկանական ակադեմիայի վրա հարձակումն անվանել է «անմարդկային» ու շեշտել, որ այն ոչ մի արդարացում չունի։