Նիգերիային զանգվածային հումանիտար ճգնաժամ է սպառնում։ Նման հայտարարություն է արել այդ երկրում ՄԱԿ Հումանիտար համակարգողի տեղակալ Փիթեր Լունդբերգը։ Նրա խոսքով մոտ 400 հազար երեխա Նիգերիայում սովի է մատնված։ Երկրի բնակիչներից շատերի համար հասանելի չեն խմելու ջուրը, պարենամթերքը, բժշկական ծառայությունները,կրթությունը։
«Արդեն յոթ տարի է «Բոկո Հարամը» պատերազմում է Նիգերիայի հյուսիս-արեւելքում։ Նրանք թալանում են գյուղերը, երկրում քաոս ստեղծում։ Մարդիկ փախուստի են դիմում՝ փրկվելով բռնություններից։ Նիգերիայում վերաբնակեցվածների թիվը մի պահ գերազանցում էր 2 միլիոնը»,- հայտնել է Նիգերիայում ՄԱԿ հումանիտար հարցերով վարչության ներկայացուցիչ Օրլա Ֆագանը։
Հումանիտար համակարգող Փիթեր Լունդբերգն էլ շնորհակալություն է հայտնել դոնորներին Նիգերիային ցուցաբերած աջակցության համար։ Միաժամանակ շեշտել է, որ այս պահին հաջողվել է հավաքել անհրաժեշտ գումարի միայն 37 տոկոսը։