Սահմանին զինվոր է զոհվել: Ղարաբաղա-ադրբեջանական հակամարտ զորքերի շփման գծում՝ Թալիշի ուղղությամբ, հակառակորդի կողմից հրադադարի խախտման արդյունքում մահացու հրազենային վիրավորում է ստացել 20-ամյա զինծառայող Գուրգեն Ավետիքի Այվազյանը: Ադրբեջանական զինուժը, հրաձգային զինատեսակներից բացի, կիրառել է նաեւ ՀԱՆ-17 տեսակի եւ հակատանկային հաստոցավոր նռնականետեր:
Գագիկ Ծառուկյանը վերադառնո՞ւմ է ակտիվ քաղաքականություն: Ասում է՝ երկու տարի առաջ «քաղաքականության էջը փակել եմ, բայց իմ ժողովրդի հետ եմ»:
Անցյալ տարի նախագահն իր սկանդալային ելույթում հայտարարել էր, որ Գագիկ Ծառուկյան քաղաքական գործիչը երկրի համար դարձել է չարիք, իսկ մենք կրկեսի վերածելու հայրենիք չունենք: Արդյո՞ք այսօր Ծառուկյանի վերադարձը քաղաքականություն ընդունելի է Հանրապետականի համար: Էդուարդ Շարմազանովը լրագրողներին ասել է. իրենք գնահատական են հնչեցրել բացառապես երեւույթների հետ կապված:
Իսկ Վահրամ Բաղդասարյանը խորհուրդ է տվել չշտապել, սպասել զարգացումներին՝ հավելելով, որ Գագիկ Ծառուկյանը պետք է որոշում կայացնի եւ իր հայտարարությունները համեմատի, որպեսզի կայացրած որոշումը համահունչ լինի:
Պատգամավոր Սամվել Ալեքսանյանը հերքում է տեղեկությունները, թե ինքն առնչություն ունի Մոսկվայում իր նախկին աշխատակից, «Ձկնկուլ» մականունով հայտնի Արմեն Իսրայելյանի սպանությանը: Անդրադառնալով ընդդիմադիր պատգամավոր Նիկոլ Փաշինյանի հայտարարությանը, թե այդ սպանության թելերը բերում են Հայաստանի Ազգային ժողով՝ հաշվի առնելով, որ «Ձկնկուլը» եղել է Ալեքսանյանի նախկին գործընկերը ու նրա հետ խնդիրներ է ունեցել, Ալեքսանյանը պատասխանել է. «Նիկոլը ե՞րբ ա ճիշտ բան ասել, որ հիմա ասի»: Հիշեցնենք, որ հոկտեմբերի 23-ին Մոսկվայի բնակարաններից մեկում Հայաստանի երկու քաղաքացու՝ 43-ամյա Էդուարդ Նշանյանի ու 46-ամյա Արմեն Իսրայելյանի մարմիններն են հայտնաբերել: Իսրայելյանի անունը կապում են պատգամավոր Սամվել Ալեքսանյանի հետ:
Մատչելի թռիչքներ դեպի Մոսկվա եւ հակառակ ուղղությամբ: Ռուսական «Պոբեդա» ավիաընկերությունը սկսում է թռիչքներ իրականացնել Գյումրու «Շիրակ» օդանավակայանից: Քաղավիացիայի գլխավոր վարչությունը տեղեկացնում է, որ թռիչքները կիրականացվեն 2016 թվականի նոյեմբերի վերջից, շաբաթական 3 անգամ, Գյումրու «Շիրակ»-ից դեպի Մոսկվայի «Վնուկովո» օդանավակայան: Ավիատոմսերի գները լինելու են սկսած 10 հազար դրամից, թռիչքները կատարվելու են ցերեկային ժամերին: Հավելենք, սակայն, որ բավական էժան սակագներով չվերթներ իրականացնող ռուսական այս ընկերությունից օգտված բազմաթիվ ուղեւորներ, մեղմ ասած, դժգոհ են մառուցված ծառայությունների որակից:
Հոկտեմբերի 24-ին դոլարն ու եվրոն կրկին ամրապնդել են դիրքերը: Արդյունքում դոլարի փոխարժեքը կազմել է 475 դրամ, եվրոյինը՝ 519, ռուբլունը՝ 7 դրամ 64 լումա, ֆունտինը՝ 580 դրամ։
Հոկտեմբերի 27-ին հանրապետության տարածքում սպասվում է առանց տեղումների եղանակ: Օդի ջերմաստիճանը 5-7 աստիճանով կբարձրանա: Երեւանում նույնպես վաղը տեղումներ չեն սպասվում:
