ԱՄՆ-ն մտադիր է 25 տարում առաջին անգամ չքվեարկել ՄԱԿ բանաձեւի շուրջ, որը դատապարտում է Կուբայի նկատմամբ ամերիկյան էմբարգոն, հայտնել է ՄԱԿ-ում ԱՄՆ դեսպան Սամանթա Փաուերը, հայտնում է BBC–ն։
Նրա խոսքով այդ քայլը կարվի՝ Կուբայի հետ հարաբերությունների բարելավմանն ուղղված նախագահ Բարաք Օբամայի քաղաքականությանը համապատասխան։ Ընդ որում նա նշել է, որ Վաշինգթոնը կտրականապես համաձայն չէ բանաձեւի այն կետին, որում ասված է, որ էմբարգոն խախտում է միջազգային օրենսդրությունը։ Փաուերը շեշտել է, որ որոշումը չի նշանակում, որ ԱՄՆ-ն լիովին հավանություն է տալիս Կուբայի կառավարության քաղաքականությանը։ «Մենք շատ մտահոգված ենք մարդու իրավունքների լուրջ խախտումներով, որոնք շարունակում է կատարել Կուբայի կառավարությունը»,- հայտնել է նա։
Վերջին քառորդ դարում ԱՄՆ-ն ամեն տարի դեմ է քվեարկել նման բանաձեւերի ընդունմանը։ Անցած տարի փաստաթուղթը հաստատվել է ՄԱԿ ԳՎ անդամ 191 երկրների կողմից, դեմ են քվեարկել միայն ԱՄՆ-ն ու Իսրայելը։
ԱՄՆ ու Կուբայի միջեւ հարաբերությունները սկսել են լավանալ Բարաք Օբամայի իշխանության գալուց հետո։ Ամերիկյան առաջնորդը մարտին ժամանել էր Կուբա, որտեղ հանդիպել էր երկրի ներկա առաջնորդ Ռաուլ Կաստրոյի հետ։ Դա ԱՄՆ նախագահի առաջին այցն էր Կուբա ՝ 1928-ից սկսած։ Շատ ամերիկյան ընկերություններ հիմա արդեն բացահայտ սկսել են դուրս գալ կուբայի շուկա, չնայած կղզում աշխատելուն վերաբերող սահմանափակումներիր մի մասը պահպանվում է։